ზამთარი დადგაო და სიცივე დადგაო კი ირითმება, მაგრამ მაინცდამაინც დიდი სიცივე არ არის, განსაკუტრებით ცხელი პოლიტიკური ამბების ფონზე. გუშინ დამარცხებული პარტია რუსთაველზე აქციას მართავდა, იმავე რუსთაველზე მამების აქცია ჯერ კიდევ არ დასრულებულა და დღეს სასამართლოც ჰქონდათ. გამარჯვებული პრეზიდენტი ახლა უკვე წინა პრეზიდენტს შეხვდა, კალაძე კი მერიის საქმეებს აგვარებდა. მოკლედ, თბილა დეკემბერში.

საქართველოს და მსოფლიოს ამბები / 3 დეკემბერი, 2018 /

      პრეზიდენტების შეხვედრა, საპრეზიდენტო მილოცვები მისთანანი, ანუ ჩავლილი არჩევნების გაგრძელება - სალომე ზურაბიშვილი დღეს გიორგი მარგველაშვილს შეხვდა. დავით უსუფაშვილი - სალომე ზურაბიშვილს გამარჯვებას არ და ვერ ვულოცავ, მე მას თანავუგრძნობ. ელისაშვილის შეცდომები - ალეკო ელისაშვილი - დროდადრო ვნანობ და მრცხვენია, საპრეზიდენტო არჩევნებში მონაწილეობა რომ არ მივიღე. ლინკოლნ მიტჩელი - გრიგოლ ვაშაძის დამარცხებაში სააკაშვილის როლი უმთავრესია. ნინო ლომჯარია - მნიშვნელოვანია, რომ ყალბი პირადობების შესაძლო გამოყენებაზე გამოძიება ჩატარდეს. ნინო ლომჯარია - ვადამდელი საპარლამენტო არჩევნები პოლიტიკური თემაა და ასეთ საკითხებში სახალხო დამცველი ვერ ჩაერევა. ირაკლი კობახიძე - შემდეგი საპარლამენტო არჩევნები ჩატარდება 2020 წლის ოქტომბერში, როგორც ამას კონსტიტუცია ითვალისწინებს. ირმა ინაშვილი პროკურატურისგან და შსს-გან ითხოვს, ჩატარდეს გამოძიება, მეორე ტურში „ნაცმოძრაობის“ მიერ მიღებული 780 ათასი ხმის რეალურობის დადგენის მიზნით. სოფიო კილაძე - გამოვრიცხავ, თითქოს „ქართული ოცნება“ ვინმესთან და განსაკუთრებით „ნაციონალურ მოძრაობასთან“ იყო გარიგებული. გიორგი მარგველაშვილმა საქართველოს ახლად არჩეული პრეზიდენტი სალომე ზურაბიშვილი მიიღო.

      ნაციონალების გუშინდელი აქცია - კარნეგის ფონდის მკვლევარი - ვფიქრობ, ქუჩაში გასვლა სასოწარკვეთილების გამოხატულებაა და არა იმის, თუ როგორ უნდა მუშაობდეს დემოკრატია. ირაკლი კობახიძე - გუშინ ვნახეთ ოპოზიციის „დიდი აქცია", მათ არავითარი რესურსი არ აქვთ რაიმე დესტაბილიზაცია შექმნან. გიორგი ვაშაძე - ჩვენ გვაქვს დემონსტრაციის ჩატარების უფლება და არ ვართ დამოკიდებული მერიის ნებართვაზე. სერგო რატიანი - ხელისუფლების მანდატი სრულიად არაადეკვატურია და აუცილებელია ვადამდელი საპარლამენტო არჩევნები. სოფიო კილაძე - ამომრჩევლის დიდმა ნაწილმა „ნაციონალებს“ უარი უთხრა და კეთილი ინებონ და შეეგუონ ქართველი ხალხის ამ დემოკრატიულ გადაწყვეტილებას.

      უკრაინული დაკავება თბილისში - პეტრო პოროშენკოს მრჩევლის ინფორმაციით, სპეცოპერაციისას დაკავებულ უკრაინის მოქალაქეებთან ერთად თბილისში რადას ერთ-ერთი დეპუტატი იმყოფებოდა. რადას დეპუტატი - თბილისში დაკავებულ უკრაინის მოქალაქეებს ადგილობრივი ოპოზიციის აქციასთან კავშირი არ აქვთ. სიმიონ სემენჩენკო - როდესაც უკრაინაში იყო პროტესტი, უკრაინელებს ქართველებით აშინებდნენ, ახლა ქართველებს აშინებენ უკრაინელებით. ადვოკატი - უკრაინელმა და ქართველმა ბრალდებულებმა პროტესტის ნიშნად, ბრალის წარდგენის ფურცელს "სლავა უკრაინა" დააწერეს და დოკუმენტს ხელი არ მოაწერეს.

      რუსთაველის მამების სასამართლო - ზაზა სარალიძე - მთავარ პროკურორსა და შინაგან საქმეთა მინისტრს შეხვედრასთან დაკავშირებით ოფიციალურად მივმართავ. ზაზა სარალიძე მოსამართლეს - მგონი მაქვს უფლება ვიცოდე, რის გამო მიკრძალავდნენ კარვების დადგმას. როგორც შინაგან საქმეთა საქმეთა სამინისტროს წარმომადგენელმა, ალეკო ნაჭყებიამ სხდომაზე განაცხადა, შეზღუდვის წინაპირობები დღეისთვის არ არსებობს, შესაბამისად, კარვები განთავსებულია რუსთაველის გამზირზე. თბილისის საქალაქო სასამართლოს მოსამართლემ ზაზა სარალიძისა და მალხაზ მაჩალიკაშვილის სარჩელზე დავა შეწყვიტა.

      მერიის გაზრდილი ბიუჯეტი - კახა კალაძის ინფორმაციით, 2019 წელს დედაქალაქის ბიუჯეტი 921 მლნ ლარი იქნება, რაც სპეც-ტრანსფერების მეშვეობით მილიარდზე მეტი გახდება. კახა კალაძის განცხადებით, ორბელიანის მოედნის რეაბილიტაციის ფარგლებში, თბილისში პირველი მასშტაბური მიწისქვეშა პარკინგის პროექტი განხორციელდება. მაია ცქიტიშვილი - ყველა აქტივობა მიმართულია იქეთ, რომ თბილისი კიდევ უფრო აქტიური და მეგობრული ქალაქი გახდეს. კახა კალაძე „რუსთავი 2“-ის ჟურნალისტს - რასაც დასთეს იმას მოიმკი, ხომ გაგიგიათ, ჩემთვის კატეგორიულად მიუღებელია ძალადობა. კახა კალაძის განცხადებით, არ აქვს ინფორმაცია სად გაიმართება პრეზიდენტის ინაუგურაცია. კახა კალაძის განცხადებით, გარკვეული კატეგორიის პირთა ხელფასების მომატებაზე მერიას ცენტრალურ ხელისუფლებასთან კონსულტაციები ექნება.

      შინაპატმრობა მეგისს - უკრაინულმა მხარემ მეგის ქარდავას საექსტრადიციო პატიმრობა შინაპატიმრობით შეუცვალა. თამარ ჩუგოშვილი - დარწმუნებული ვარ, როგორც კი საექსტრადიციო პროცედურები დასრულდება, მეგის ქარდავა გადმოეცემა ჩვენს ქვეყანას.

      საკალათბურთო სიხარული - საქართველოს საკალათბურთო ნაკრებმა ისრაელი 71:69 დაამარცხა.

საზღვარგარეთულები:

      არჩევნების მოთხოვნა ევროპაშიც - მარინ ლე პენი ვადამდელი საპარლამენტო არჩევნების ჩატარებას მოითხოვს.

      ბრალი ქერჩის სტურეში ცურაობისთვის - ТАСС - ქერჩის სრუტეში დაკავებულ უკრაინელ სამხედროებს ბრალი რუსეთის სახელმწიფო საზღვრის უკანონო გადალახვის მუხლით წაუყენეს.