გულწრფელი სიყვარული იცით როგორია?

      ძალიან მოკლე ამბავი უნდა მოგიყვეთ.

      22:30 იყო, როდესაც თომას უკვე ძილისპირული ეწყებოდა და დედამისს დავუტოვე ოთახში. გამოვედი და ტელეფონზე დამხვდა 8 გამოტვებული ზარი ერთი და იმავე ადამიანისგან. შეშინებულმა გადავურეკე, რა ხდება, ხომ მშვიდობაათქო.

- კი, მშვიდობაა. როგორ ხარ?

- რავიცი, ცოტა მეძინა და შენი ზარები რომ დამხვდა, შემეშინდა, დაგირეკე.

- არაფერი, უბრალოდ მოკითხვა მინდოდა. ხომ არ აცრილხარ?

- ჯერ არა.

- ძალიან კარგი. არ უნდა აიცრა.

      ამის შემდეგ იწყება მთელი ამბავი, ზუსტად 15 წუთი მიხსნიდა რატომ არ უნდა ავიცრა. მომიყვა წმინდა პაისის წინასწარმეტყველება მეორედ მოსვლის შესახებ, მოსვლის წინ ვირუსის და მისი ვაქცინის შექმნის ისტორია, მელაპარაკებოდა იმაზე, თუ ვაქცინა როგორ იქნება მხეცის ნიშანი, რა შეუძლია ნანო ტექნოლოგიებსა და როგორია თხევადი ჩიპი, როგორია მის გავლენა დნმ-ს ცვლილებაზე, მიხსნიდა როგორ მოხდება ადამიანის მართვა, ასევე, მანათობელი ნივთიერების, ლუციფერინის ორგანიზმში მოხვედრის შემდეგ, როგორ გამოარჩევენ „დანიშნულ“ ადამიანებს, რომ არეულობა უკვე დაწყებულია და ღაზას ამბები ამის დასტურია, რომ დაინგრევა ალ-აქსა და ომარი და ა.შ. და ა.შ. საუბრის ბოლოს კი მეუბნება:

- ხომ იცი რომ ძალიან მიყვარხარ და დიდ პატივს გცემ. სწორედ ამ სიყვარულის გამო გეუბნები ამას, რომ არავითარ შემთხვევაში არ უნდა აიცრა, რაც არ უნდა მოხდეს.

      დავემშვიდობეთ ერთმანეთს.