ყოველი სიმრავლე ანუ შეერთებულთაგან არს ანუ ერთთაგან. რამეთუ თითოეული სიმრავლისაჲ აღმოიჩინა, ვითარმედ არა არს მხოლოდ მრავალ ოდენ, რაჲთამცა იყო თითოეული კუალად მრავალ. ხოლო თუ არა არს მარტოდ ოდენ სიმრავლე, ანუ შეერთებული იყოს ანუ ერთნი. ხოლო თუ ეზიარების ერთსა, იყოს პირველ შეერთებული. და სადაჲთ გამო იწყო პირველ შეერთებულმან, მუნით და ერთთაცა. ხოლო თუ არს თჳთერთი, იყოს და პირველ მზიარებელიცა მისი და პირველ შეერთებული. ხოლო ესე პირველ შეერთებული ერთთაგან. და თუ შეერთებულთაგან, კუალად შეერთებულნი იყვნენ სხუათა ვიეთგანმე; და ესე ვიდრე უსაზღუროობამდე. ჯერ არს უკუე, რაჲთა იყოს პირველი შეერთებული ერთთაგან, და ვპოოთ დასაბამით-გამოჲ.

იოანე პეტრიწი