ბოლო დღეებია ჩინეთში არანორმალური ჩემპიონატი მიმდინარეობს. საქართველოში (სხვა ქვეყნის მონაცემები უბრალოდ არ ვიცი) თითქმის ყოველივე მეოთხე გასტრიტით იტანჯება და მკაცრ, საშუალო ან სალხინებელ დიეტაზეა, ამიტომ მეეჭვება ოდესმე ეს ჩემპიონატი ქართველებს შორის გაიმართოს. აი, ჩინეთში კი როგორც აღმოჩნდა, წიწაკა არაა პრობლემა, არც იმ დოზით, რაც მონაწლეებმა მიიღეს.

      ჟეჯინგის პროვინციის ქალაქ ჰანგჟუში, ჩინეთში გაიმართა ყინულისა და ცეცხლის დღესასწაული. ჩვენს მიერ ხსენებულმა ჯორჯ მარტინმაც, ალბათ სწორედ ამ ჩემპიონატის ნახვის შემდეგ დაწერა ჩვენთვის კარგად ცნობილი ნოველები (A Feast of Ice and Fire (ამდენი წიწაკის ჭამის შემდეგ, ვინ არ გამოუშვებს პირიდან ცეცხლს?!)). საქმე ის გახლავთ, რომ ჩემპიონატის მისიაა ბევრი წიწაკის ჭამა და გამძლეობა. გამძლეობა იმისა, რომ წიწაკები დაიტიო პირსა და კუჭში და გამძლეობა იმისა, რომ პარალელურად იჯდე ყინულებით სავსე კასრში. საკმარისია ყინული ოდნავ შედნეს, უმალ შეავსებენ კასრს ახალი ყინულებით. ისე მოხდა, რომ ამ დღესასწაულზე ქალაქში 40 გრადუს ტემპერატურას აჩვენებდა თერმომეტრი. დიოგენესგან განსხვავებით, თქვენი კასრი დგას სცენაზე, ზიხართ ან დგახართ შიგნით, გარშემო წყალი და შადრევნებია, კასრი სავსეა ცივი, ყინულებით გაჯერებული წყლით და მიირთმევთ რაც შეიძლება ბევრ წიწაკა - წითელს, მწვანეს, ბულგარულ, ცხარეს, ტკბილს, რაც შეიძლება ბევრს. მთავარია, დიდხანს გაუძლოთ და გამარჯვებაც თქვენ დაგრჩებათ. რა თქმა უნდა, ასეთი "კომფორტული" პირობების, შინაგანი მხურვალებისა და გარეგანი გამყინვარების გამო კონკურსს ბევრი მონაწილე ეთიშება. ვითარების დასამძიმებლად იმასაც გეტყვით, რომ თითეულ მონაწილეს, საშუალოდ 3-4 კილოგრამი წიწაკის ჭამა უწევს ერთ შეჯიბრებაზე. გამარჯვებულს საერთო ჯამში 8-10 კილომდე წიწაკა აქვს ნაჭამი. თუ სამ ტურზე გაიწელა 12-13 კილოგრამამდეც ადის. წელს მონაწილეობას 40-მდე მოხალისე იღებდა. 

      ასეთ შეჯიბრებას, ისევ მამა-პაპური, დალოცვილი, ქართული ტრადიციები სჯობს - ხინკლის ჭამაში და ღვინის სმაში შეჯიბრი. ან იყოს ამერიკული ჰოთდოგების ჭამის ჩემპიონატი.

      ფოტოებზე იმ ემოციებს ამოკითხავთ, რაც მონაწილეთა ბედნიერებას უკავშირდებოდა.

      მონაწილეობის მსურველები თუ გამოჩნდებიან, გამოგვეხმაურეთ და საქართველოშიც ჩავატაროთ. განსხვავებულობისთვის პურზე წასმული მეგრული აჯიკის ჭამის კონკურსი იყოს!