პოლიტიკა თუ ბინძური საქმეა, მაშინ მცხეთა ერთ-ერთი ყველაზე სუფთა და წკრიალა ქალაქია მსოფლიოში. არა, განა იმიტომ რომ მცხეთაში პოლიტიკოსები არ არიან, არა - უბრალოდ მცხეთელები არასოდეს ერევიან ამ პოლიტიკოსების მართვის საქმეში. როგორ უნდა ჩაერიონ? შეთავაზებით, მსჯელობით, კრიტიკით, არგუმენტაციით. პოლიტიკური აქტიურობა ანდა რაიმეს პროტესტი ისეთი იშვიათი მოვლენაა, რომ მყისვე საყოველთაო ყურადღებას იპყრობს. იშვიათად მცხეთაში ვინმემ რამე გააპროტესტოს და რაიმე უკმაყოფილება გამოთქვას (საჯაროდ, თორემ საკუთარ სახლებსა და გულებში, იცოცხლე, არ აკლებენ). ასეთ ფონზე დღეს სრულიად უნიკალური და რაც მთავარია, საკმაოდ ხალხმრავალი აქცია გაიმართა. მცხეთის მოსახლეობის ნაწილი აპროტესტებს მცხეთის გენერალურ გეგმაზე მომუშავე ორგანიზაციის (ამხანაგობის) „აქოლისის“ მიერ შემუშავებულ მცხეთის გენერალური გეგმის კონცეფციას.

რა არის ამაში უცნაური?

      პროტესტი მხარდაჭერილია ადგილობრივი ხელისუფლების მიერ - „მე, როგორც თქვენს მიერ არჩეული მერი, პირველ რიგში ვალდებული ვარ დავიცვა მოსახლეობის ინტერესები და ვუზრუნველყო მსოფლიო მაშტაბით აღიარებული კულტურული მემკვიდრეობის ძეგლების დაცულობა და წარმოჩინება.“ - ვკითხულობთ მცხეთის მერის განცხადებაში.

      ანუ მცხეთაში, ადგილობრივი ხელისუფლების მხარდაჭერით იმართება აქცია და მოსახლეობა კერძო კომპანიისგან მოითხოვს დაუჯეროს ადგილობრივ ხელისუფლებას? აბა, დაუკვირდით. არ გეჩვენებათ უცნაურად როცა ხელისუფლება (!) აპროტესტებს? მეგონა ხელისუფლებაში ყოფნა ნიშნავდა, ასეთი კერძო კომპანიებისთვის მოსახლეობის ინტერესების გათვალისწინების მოთხოვნას. და რაც მთავარია ამის ძალაუფლების ფლობას ანუ ხელისუფლებას! ვის მიემართება ეს პროტესტი? კარგი, ამ უცნაურობას შევეშვათ...

რა არის მცხეთის გენერალური გეგმის პრობლემა?

      არგუმენტირებულად და დანამდვილებით არავინ იცის. და ის ფაქტი რომ არავინ იცის, ქმნის უდიდეს პრობლემას. ამ არავინში, ვგულისხმობ მცხეთის მოსახლეობას და მათ შორის იმ ნაწილსაც, რომელიც დღეს აქციაზე იყო მისული. რატომ არ იციან? იმიტომ, რომ არგუმენტებით და დეტალურად, არც არავის აუხსნია ეს მათთვის!

      ამბავი ხმაურიანი მას შემდეგ გახდა, რაც „აქოლისმა“ კონცეფციის საბოლოო დოკუმენტი შესთავაზა მცხეთას (იხ. სრული დოკუმენტი: ქალაქ მცხეთის გენერალური გეგმის კონცეფცია და ასევე: მცხეთის გენ. გეგმის დამატებითი გრაფიკული მასალა), ხოლო ინტერნრეტჟურნალ ბაგინეთზე გამოქვეყნდა სტატია სათაურით - „იხილება მცხეთა-მთიანეთისა და მცხეთის მუნიციპალიტეტის დაშლის გეგმა“. მცხეთაში ხმა გავარდა რომ ჩვენს ქალაქს აუქმებენ, რომ მცხეთა თბილისს უნდა შეუერთონ, რომ ამ ყველაფერში ვიღაცის კერძო ინტერესებია და ქალაქისთვის არაფერი კეთდება და ა.შ. იმ ფონზე, რომ ბოლო რამდენიმე წელია მცხეთას მართლაც მძიმე ტვირთად აწევს მორატორიუმი, ძნელია არ დაიჯერო ასეთი ხმების. მაგრამ... აქოლისი წლების განმავლობაში მუშაობდა ამ პროექტზე, იქამდე სხვა კონტრაქტორიც მუშაობდა, ამ წლების განმავლობაში მუშაობის პროცესში ჩართული იყო მცხეთის მუნიციპალიტეტი, 2019 წელს, მორატორიუმის გამოცხადებიდან 4-5 წლის შემდეგ, მარტის თვეში, საკანონმდებლო მაცნე არეგისტრირებს მცხეთის მუნიციპალიტეტის დასახლებათა ტერიტორიების გამოყენებისა და განაშენიანების რეგულირების საკითხთა საბჭოს დებულებას - ანუ შეიქმნა საბჭო, (იქამდე რატომ არ შეიქმნა, კაცმა არ იცის). და ეს საბჭოც, ვალდებულებას იღებს ყოველ 6 თვეში ერთხელ წარუდგინოს მცხეთის მუნიციპალიტეტის საკრებულოს ანგარიში, გაწეული მუშაობის შესახებ (დებულბის მე-8 პუნქტში წერია ეს). ანუ წელიწადში მხოლოდ ორჯერ უნდა აუხსნას საკრებულოს რა კეთდება მცხეთის ყველაზე მნიშველოვანი პრობლემის მოსაგვარებლად. მხოლოდ ორჯერ, ისიც საკრებულოს და მოსახლეობამ როდისღა უნდა გაიგოს ეს ყოველივე? ანუ მთელი ეს პროექტი თუ ასეთი ცუდია, აქამდე რატომ არ იცოდა მოსახლეობამ არაფერი?

ვინაა დამნაშავე?

      ეს ის კითხვაა, რომელზე პასუხიც აუცილებლად უნდა ვისწავლოთ, არა მხოლოდ მცხეთელებმა, არამედ მთელმა ქვეყანამ. როდესაც კონკრეტული ადამიანი ჩადის დანაშაულს სხვა ადამიანის მიმართ, დამნაშავეა მხოლოდ ეს ადამიანი. ხოლო, თუ ადამიანი ჩადის დანაშაულს, რომელიც ქვეყანას აზიანებს და ამას წლების განმავლობაში აკეთებს, დამნაშავეა ხელისუფლება რომელიც ამის უფლებას აძლევს მას. როდესაც სახელმწიფო არ ვითარდება სწორად, დამნაშავეა ხელისუფლება, რაც არ უნდა ისაუბროს კერძო ადამიანების ინტერესებზე, მაინც ხელისუფლებაა დამნაშავე. კერძო ინტერესები ვახსენე იმის გამო, რომ აქამდე კულუარებში თქმული, ახლა უკვე საჯარო განცხადება გახდა. გუშინ, რუსთავი ორის ეთერში, გადაცემა კურიერში (იხ. 13/02/2021 - 21:17) მცხეთის მერმა ერთ-ერთ ასეთ დაინტერესებულ პირად დაასახელა ალავერდელი მიტროპოლიტი დავითი (შეგახსენებთ, საპატრიარქო დაინტერესებული მხარეა, ეს გენ. გეგმის პირველივე ფურცლებზე წერია). დღეს აქციაზე კიდევ უფრო მეტი სახელი და გვარი გახმიანდა. თავის მხრივ, მიტროპოლიტმა დავითმა უარყო და აქეთ დასდო ბრალი მცხეთის მმართველებს, მეორე მხრივ, აქოლისმა მოითხოვა არგუმენტაცია და ალავერდელთან გარიგების დამადასტურებელი საბუთი, მცხეთამ განცხადება დაწერა ფეისბუკზე და ა.შ. მთელს ამ სანახაობას (პურის გარეშე) ვუყურებთ მცხეთელები და ხან ერთი მხარის გვჯერა, ხან მეორის. იმავე გადაცემაში ისიც ითქვა, რომ ბოლო 5 წელია მცხეთაში ვერავინ ვერაფერს აკეთებს, სახურავსაც ვერ ცვლიან, კედელს ვერ ღებავენ, ფანჯარა ვერ ამოუშებენიათ და ა.შ. არადა, მცხეთელები მაინც ნუ მოვიტყუებთ თავს - კარგად ვხედავთ ამ ხუთი წლის განმავლობაში რამდენი რამ აშენდა კერძოს საკუთრებებში (ინფრასტრუქტურული პროექტებიც ხორციელდება, ოღონდ ცოტა). წლებია ისმის პასუხი, რომ თეატრონის ტერიტორია გაყიდულია, ამიტომ იქ არაფერი კეთდება - არადა, შეგიძლიათ შეხვიდეთ საიტზე maps.napr.gov.ge და ნახოთ, რომ თეატრონის მესაკუთრეა სახელმწიფო (კონკრ. სსიპ მცხეთის მუნიციპალიტეტი).

      მეორე მხრივ არგუმენტირებული პრეტენზიებია საჭირო აქოლისის მიმართ, განსაკუთრებით პროექტის მოსამზადებლად გამოყოფილი ვადების დარღვევის გამო, ასევე საერთაშორისო ორგანიზაციების რეკომენდაციების გაუთვალისწინებლობის გამო (თუ ასეთი დასტურდება), თბილისთან შესაძლო მიერთების და გარეუბნად გადაქცევის გამო (ესეც დასასაბუთებელია) და ა.შ, აქოლისი აცხადებს, რომ გენ. გეგმის კონცეფცია მცხეთის მოსახლეობის გამოკითხვით და მათი ინტერესების გათვალისწინებით შეიქმნა, მაშ, ეს ხალხი ვინ იყო დღეს აქციაზე? თუმცა ეს პრეტენზიები ადგილობრივმა ხელისუფლებამ უნდა წაუყენოს და არა მოსახლეობამ, და ადგილობრივმა ხელისუფლებამ არა ქუჩის აქციით, არამედ ვალდებულების და პასუხისმგებლობის მოთხოვნით.

ვინ გაარჩევს მტყუან-მართალს?

      საზოგადოება. არ ვფიქრობ, რომ საზოგადოება ყოველთვის ჭეშმარიტების მხარესაა (მეტიც, თითქმის არასდროსაა მის მხარეს), მაგრამ არჩევანი მაინც მისი გასაკეთებელია, ხოლო არჩევანის გასაკეთებლად მას სჭირდება სრული, არგუმენტირებული კითხვა-პასუხი.

რა უნდა გაკეთდეს?

საჯარო განხილვა!

როგორ?

      ახლა როდესაც წინასწარი მოკვლევები უკვე ჩატარებულია, გარემო შესწავლილია, გაქვთ სრული ინფორმაცია ამა თუ იმ ლოკაციის შესახებ, მოაწყვეთ შეხვედრა, სადაც ყველა დაინტერესებული მხარე იქნება წარმოდგენილი - პირობითად დარბაზში დაინტერესებული მცხეთელები, სცენაზე ხელისუფლება (როგორც ადგილობრივი, ასევე სამინისტოების წარმომადგენლები), საპატრიარქო და აქოლისი. შეხვედრა ნუ დაემსგავსება ცისფერ მთებს, არამედ შეხვედრა იყოს საქმიანი და შედეგიანი. აუცილებელია პირდაპირი ეთერი და სრული ჩანაწერი, რომლის ტრანსლირებასაც ადვილად შეძლებთ YouTube-ზე (არცერთი ტელევიზია ამდენ დროს არ დაგითმობთ და ამიტომ). მიიღეთ სრული მოხსენება აქოლისისგან, და პუნქტობრივად, დეტალურად, აბზაც-აბზაც, დასვით კითხვები და წარმოაჩინეთ გენ. გეგმის პრობლემები. ერთი დღე თუ არ გეყოფათ, მეორე დღეს ჩანიშნეთ შეხვედრა, მერე მესამე დღეს და ა.შ. მხოლოდ, ასეთი მუშაობით დაიდება შედეგი და დასრულდება მრავალწლიანი ტანჯვა.