კორონას ამბები, საერთო ლოცვა და დოლარის მაღალი ნიშნული - 3.2896. ნატოს მდივნის პოზიტიური შეფასებები ჩვენი ბრძოლის მეთოდებისა და კერძო ტესტები ან პირბადეები. კარგი ამბავიც არის - ორ კვირაში, საქართველოში ჰაერის დაბინძურების მაჩვენებელი შემცირებულია.

საქართველოს და მსოფლიოს ამბები / 27 მარტი, 2020

      შიდა კორონა - ამ დროის მონაცემებით: საქართველოში, კორონავირუსის დადასტურებული შემთხვევა - 83 და მათ შორის გამოჯანმრთელებული - 14. კარანტინის რეჟიმში - 4641, სტაციონარში მეთვალყურეობის ქვეშ - 239. მარინა ეზუგბაიას ინფორმაციით, კორონავირუსით ინფიცირებული 4 ახალი პაციენტიდან 1 ინფექციურ საავადმყოფოშია მოთავსებული. სამხედრო მოსამსახურეებს კორონავირუსი არ დაუდასტურდათ. ექიმის ინფორმაციით, კორონავირუსით ინფიცირებული 2 წლის ბავშვის ჯანმრთელობის მდგომარეობა სტაბილურია. მარინა ეზუგბაიას ინფორმაციით, ინფექციურ საავადმყოფოში მოთავსებული 5 ბავშვის ჯანმრთელობის მდგომარეობა დამაკმაყოფილებელია. ნათია თურნავა - მადლობა იმ სასტუმროების მფლობელებს, რომლებმაც სრულიად უსასყიდლოდ დაგვითმეს სასტუმროები საკარანტინო სივრცეებისთვის. თსსუ-ს პირველ საუნივერსიტეტო კლინიკაში 3 ახალშობილია მოთავსებული, რომელთა მდგომარეობა მძიმეა. ბოჭორიშვილის კლინიკაში მოთავსებული, კორონავირუსით ინფიცირებული პაციენტების მკურნალობის პროცესი დადებითი დინამიკით მიმდინარეობს. ლევან რატიანის ინფორმაციით, კორონავირუსით ინფიცირებული 3 პირის მდგომარეობა გაუმჯობესებულია და მათ კლინიკა შესაძლოა, ხვალ დატოვონ. დიმიტრი ხუნდაძე - თუ საზოგადოების ადეკვატური ქცევა არ იქნა და ეპიდვითარება გართულდა, დადგება საყოველთაო კარანტინის საკითხი - მინდა გულწრფელად გითხრათ, ამ ვითარებიდან შორს არ ვართ. ლევან რატიანის განცხადებით, 62 და 80 წლის პაციენტების მდგომარეობა კვლავ კრიტიკულია. კახა კალაძე „ნაციონალურ მოძრაობაზე“ - თავისი ქმედებებიდან გამომდინარე, ისინი არიან ჩვეულებრივი მავნებლები. ბოჭორიშვილის კლინიკის დირექტორის განცხადებით, კორონავირუსით დაინფიცირებული ყველა პაციენტის კლასტერი და კონტაქტი დადგენილია. მაღალი ტემპერატურის გამო, კახეთიდან თბილისში 50 წლამდე მამაკაცი გადმოიყვანეს. ეკატერინე ტიკარაძე - გეგმური ოპერაციების მომლოდინე პაციენტები 4 თვის განმავლობაში გადანაწილდებიან. თვითიზოლაციის წესების დარღვევის გამო, პოლიციამ 3 პირი სამი ათასი ლარით დააჯარიმა. მამუკა მდინარაძე - თუ საჭიროება დადგება და რისკები გაიზრდება, არც ერთ სცენარს არ გამოვრიცხავთ, მათ შორის, სრული კარანტინის გამოცხადებას. ლევან რატიანი - სწრაფ ტესტებს ასპროცენტიანი კლინიკური ღირებულება არ გააჩნიათ. კორონავირუსით ინფიცირებულ ფეხმძიმე ქალთან პათოლოგიური მდგომარეობა არ ვლინდება. სამი ახალშობილის მდგომარეობა დინამიკაში უცვლელია, ხორციელდება მართვა - იმედია, ყველაფერი კარგად იქნება. "ერთიანი ნაციონალური მოძრაობა" მთავრობისგან სწრაფი ტესტების შეძენაზე კონტრაქტების გასაჯაროებას ითხოვს. ჩინურ კომპანიას, რომელსაც საქართველომ ხელშეკრულება შეუწყვიტა, ქვეყანაში 200 000-მდე სწრაფი ტესტი უნდა შემოეტანა. საგარეო უწყება უცხოეთში მყოფ მოქალაქეებს აფრთხილებს, კერძო პირებისა და პოლიტიკური ჯგუფების დაპირებებს არ ენდონ. ნატო-ს გენერალური მდივანი - საქართველო წარმატებით უმკლავდება პანდემიას. მარინა ეზუგბაია - 4 მძიმე პაციენტი გვყავს და ერთი ასაკოვანი ქალბატონი განსაკუთრებით მძიმედაა.

      ეკონომიკის პრობლემები - ბადრი ჯაფარიძე - კორონავირუსის გამო, საქართველოს ეკონომიკას 6 მილიარდი ლარის მოცულობის რესურსი სჭირდება. რომან გოცირიძე - საქართველომ საერთაშორისო საფინანსო და საკრედიტო ორგანიზაციებს უნდა მიმართოს და საგარეო ვალის გადავადება მოითხოვოს.

      #დარჩიკრეატიული - საკრებულოს განათლებისა და კულტურის კომისია თავის Facebook პლატფორმას ხელოვანებს უთმობს.

      კორონა საპატიმროში - იუსტიციის მინისტრი - კორონავირუსის აღმოფხვრამდე არც ერთი პატიმარი არ გავა სასამართლო პროცესზე. იუსტიციის მინისტრის განცხადებით, გამორიცხული არ არის, საქართველოში ციხეებმა 3 აპრილის შემდეგაც განსაკუთრებულ პირობებში გააგრძელოს მუშაობა.

      მიმართვა პატრიარქს - გიგი უგულავა პატრიარქს - მოგმართავთ თხოვნით ციხიდან, პრაქტიკულად ბავშვობიდან მიცნობთ, არასდროს პირად საკითხზე არ შემიწუხებიხართ - გევედრებით, შეაჩერეთ ეს კატასტროფა, საშიშროება მართლაც რეალურია, მოუწოდეთ მრევლს დარჩეს სახლში.

      პენსიონერები - საქართველოში ყველა ასაკის პენსიის მიმღებ პირს აპრილის თვის პენსია წინასწარ ჩაერიცხება.

      ვირუსი ოკუპაციაში - ქეთევან ციხელაშვილი - საქართველოს ხელისუფლება ბოლო კვირების განმავლობაში, ყველა შესაძლო არხით ჩართულია ოკუპირებულ ტერიტორიებზე COVID-19-ის გავრცელების პრევენციისთვის. თეონა დოლენჯაშვილი - ხელისუფლება ნაკლებ ყურადღებას აქცევს საკუთარ მოქალაქეებს ოკუპირებულ ტერიტორიაზე. ოკუპირებულ აფხაზეთში საგანგებო მდგომარეობა ცხადდება.

      ივა ჭყონია - თუ კურსი 3.3 ნიშნულზე შენარჩუნდა, იმპორტირებული პროდუქტების უმრავლესობაზე აპრილში ფასები აუცილებლად მოიმატებს.

      საქმიანი კარანტინი - ბოლნისისა და მარნეულის მუნიციპალიტეტების ტერიტორიაზე ჯამში 349 მეწარმე სუბიექტია.

საზღვარგარეთულები:

      მსოფლიო ომი - ჯანდაცვის მსოფლიო ორგანიზაციის დირექტორი - ჩვენ ომში ვართ და ვირუსი განადგურებით გვემუქრება - უნდა იბრძოლოთ, იბრძოლოთ მაგრად, ჯოჯოხეთურად უნდა იბრძოლოთ. თურქეთში კორონავირუსით ინფიცირებულთა რაოდენობა 3629-მდე გაიზარდა, დაღუპულია 75 ადამიანი. სომხეთში კორონავირუსით ინფიცირებულთა რაოდენობა 329-მდე გაიზარდა. აშშ-ის და ჩინეთის პრეზიდენტებს შორის სატელეფონო საუბარი შედგა. რუსეთში კორონავირუსით ინფიცირებულთა რაოდენობა 1036-მდე გაიზარდა. აზერბაიჯანში დასახლებულ პუნქტებს შორის მოძრაობა აიკრძალა. კრემლში კორონავირუსის პირველი შემთხვევა დადასტურდა. კორონავირუსი ბრიტანეთის ჯანდაცვის მდივანსაც დაუდგინდა. იტალიის ჯანდაცვის ეროვნული ინსტიტუტი - იტალიაში კორონავირუსის ეპიდემიას ჯერ პიკისთვის არ მიუღწევია. დიდ ბრიტანეთში ბოლო ერთი დღის განმავლობაში კორონავირუსით 181 ადამიანი გარდაიცვალა. იტალიაში ბოლო ერთ დღეში კორონავირუსით 919 ადამიანი გარდაიცვალა.

      ერთობლივი ლოცვა - იერუსალიმში ქრისტიანმა, ებრაელმა და მუსლიმმა სასულიერო ლიდერებმა ერთობლივი ლოცვა აღავლინეს.