წარმოშობით მეგრელი, დაიბადა ხაბუმეშში, ცნობილი მჭედლის - მაშურია გოგუას ოჯახში 1859 წელს. დუხჭირი ცხოვრების გამო დაწყებითი, სასკოლო განათლება არ მიუღი, თუმცა როცა მამის სამჭედლოში შეგირდობდა, 8 წლისამ სკოლის მოსწავლე მეგობრებისგან წერა-კითხვა ადვილად შეისწავლა. 15 წლის იყო, როცა პროფესიონალი მჭედელი შეიქნა და მიუხედავად მისი მუსიკალურ, სამომღერლო მოღვაწეობისა, ცხოვრების ბოლომდე არ უღალატია მჭედლის წოდებისთვის. სიმღერა მისი ცხოვრების თანამგზავრი იყო და ბავშვობიდან უყვარდა. ჯერ თავად სწავლობდა უფროსი მომღერლებისგან, შემდეგ კი თანატოლებს ასწავლიდა.

      1919 წელი განსაკუთრებული აღმოჩნდა მის ცხოვრებაში. სწორედ მაშინ შეხვდა ძუკუ ლოლუას, რომელმაც მრავალი სიმღერა შეასწავლა. თავის მხრივ, ძუკუმაც ისწავლა თადასგან მისთვის უცნობი სიმღერები და გუნდის რეპერტუარში დაამკვიდრა, თადას კი სასარგებლო რჩევები მისცა ხალხური სიმღერის მოვლისა და შეურყვნელად შენარჩუნებისათვის.

      როგორც წერა-კითხვაში, სიმღერების შესწავლაშიც განსაკუთრებული ნიჭიერებით გამოირჩეოდა. 1922 წელს ისევ ზუგდიდში ვარლამ სიმონიშვილი და სამუელ ჩავლეიშვილი გაიცნო და მათგან თორმეტამდე გურული სიმღერა შეისწავლა სულ რაღაც თვენახევარში.

      1928 წელს, 69 წლის ასაკში, ხანდაზმულმა თადამ მშობლიურ ჩხოროწყუში თავად ჩამოაყალიბა მცირერიცხოვანი გუნდი. თადას გუნდი სოფლებში მართავდა კონცერტებს და გამოირჩეოდა ხალხური საშემსრულებლო სტილისა და მანერის ერთგულებით. გუნდის რეპერტუარი პირველად გრიგოლ კოკელაძემ ჩაწერა ნოტებზე (სანოტო ხელნაწერები ინახება ფოლკლორის სახელმწიფო ცენტრის არქივში). 1932 და 1937 წლებში გუნდმა წარმატებას მიაღწია ოლიმპიადებზე. 1938 წელს ჭარმაგი ასაკის გამო თადამ გუნდის ხელმძღვანელობა მიატოვა თუმცა ამის შემდეგ კიდევ დიდხანს იცოცხლა. 104 წლისა იყო როცა გარდაიცვალა 1963 წელს.

"ფონდი ქართული გალობა"