ანდრია პირველწოდებულის სახელზე აგებული ტაძრებიდან გაგაცნობთ ერთ-ერთს. რომელიც ჩვენი დედაქალაქის (თბილისის_მ.თ.) შუაგულში - ვერის ბაღში მდებარეობს. მას ქართველი ერი იცნობს „ლურჯი მონასტრის“ სახელით. იგი აგებულია XII საუკუნის ბოლოს, ძველი ეკლესიის ადგილზე, მისი ცალკეული ნაწილების ჩართვითა და გამოყენებით. ტაძარი ააშენა თამარ მეფის დროინდელმა ეპისკოპოსმა ბასილიმ, თავისი ძმის, ცნობილი მოღვაწის - აბულასანის დახმარებით. XVII საუკუნეში ტაძარი დაინგრა, შემდგომ კვლავ აღადგინეს, ოღონდ გუმბათის გარეშე. 1873 წელს, ტაძარი რესტავრირებული იქნა არქიტექტორ   ა. ჩიჟოვის პროექტით, მისი სტილისტური და სამშენებლო თავისებურებების გათვალისწინების გარეშე ხელმეორედ დააშენეს გუმბათი, ქართული არქიტექტურის ტრადიციებისათვის სრულიად უცხო ფორმითა და პროპორციებით. ტაძარში, ღმრთისმსახურების აღდგენამდე, მოთავსებული იყო ქართული მედიცინის ისტორიის მუზეუმი. ბოლო წლებში, მღვდელი ზაქარია ძინძიბაძის წინამძღვრობის დროს, ტაძარს მოეხსნა სფერული გადახურვის გუმბათი და დაეგდა ქართული სტილის გუმბათი 1997წ.

          ამ ეკლესიაში ორჯერ მოხდა ღმრთისმშობლის გამოცხადება: პირველად 1997 წლის 28 აგვისტოს (ახ.სტ.), მარიამობას, ეკლესიის ეზოში, ღრუბელზე მომავალი გაბრწყინვებული ღმრთისმშობელი იხილეს. მეორედ თვით ეკლესიაში - 1998 წელს, ქრისტეს შობის წინა დღიდან, 6 იანვრიდან (ახ.სტ.) ნათლისღების ჩათვლით ღმრთისმშობელი ბრძანდებოდა ტაძრის მარცხენა სარკმელთან, რომელმაც მრავალი მოაქცია ჭეშმარიტ სარწმუნოებაზე ( ლია ბარბაქაძე, საქართველოს საეკლესიო ისტორიის სახელმძღვანელო 5-6 კლასი, 2001წ.).