იმპერატორმა ტრაიანემ 99 წელს აღადგინა კანონი. კანონის მიხედვით ქრისტიანებს ეკრძალებოდათ საიდუმლო შეკრებები. კანონის დამრღვევები სიკვდილით ისჯებოდნენ . წამებულთა გვამებს წარმართები დაუმარხავად ტოვებდნენ.

     ხუთმა ქალწულმა: აგლაიდამ, აპოლონარიამ, დარიამ, მამათუსამ და ტაისამ გადაწყვიტეს მიცვალებულთა დაკრძალვა.

     ეს ამბავი როცა გაიგო მეფის ასულმა - დროსიდამ, წმინდა ქალწულებს სთხოვა თან წაეყვანათ. მეფის ასული ქალწულებმა თან წაიყვანეს. ამ დროს ქრისტიანთა გვამებს იმპერატორის ბრძანებით ჯარისკაცები დარაჯობდნენ, რადგან ხელთ ეგდოთ მიცვალებულთა გამპატიოსნებლები. მათ შეიპყრეს ქალწულები.

     იმპერატორის ბრძანებით დროსიდა ცალკე გაიყვანეს, ხოლო ქალწულები ცოცხლად დაწვეს სპილენძის სადნობ ღუმელში. ნეშტგარეული სპილენძისგან კი იმპერატორის აბანოსათვის სამფეხა ჩამოასხეს.

     აბანოში ვერავინ შედიოდა. ვინც ზღურბლს გადააბიჯებდა უსულოდ ეცემოდა. ქურუმები მიხვდნენ მიზეზს. აბანოში სამფეხის ნაცვლად ქალწულმოწამეთა მსგავსი შიშველი ქალის ძეგლი დადგეს.

     იმავე საღამოს იმპერატორმა იხილა სამოთხეში მობალახე ხუთი კრავი და მწყემსი, რომელმაც უთხრა: "უსჯულოო და უწმიდურო მეფეო! კეთილმა და მოწყალე მწყემსმა წარგგვარა შენს მიერ შეურაცხყოფილთა სულები და დააწესა იქ, სადაც მოვა წმიდა კრავი დროსიდა, ასული შენი".

     მეორე დღეს იმპერატორის ბრძანებით გაახურეს ორი უზარმაზარი ღუმელი და იქვე ჩამოჰკიდეს ბრძანება: "გალილეველნო, ჯვარცმულის თაყვანისმცემელნო, თავი აარიდეთ აუტანელ წამებას, ჩვენ კი აგვარიდეთ შრომას – მსხვერპლი შესწირეთ ღმერთებს, თუ ეს არ ძალგიძთ, ნებაყოფლობით შედით ღუმელში". იმ დღეს ბევრი ქრისტიანი ეწამა.

     დროსიდასაც სურდა უფლისათვის თავი შეეწირა და შეევედრა შეუმჩნევლად გაეყვანა საპყრობილიდან. უფალმა ისმინა მისი ვედრება.

     როცა დარაჯებს ჩაეძინათ, დროსიდა შეუმჩნევლად საპყრობილედან გავიდა და მდინარეში ნათელიღო.

     შვიდი დღე მარხულობდა და ლოცულობდა. მერვე დღეს საკუთარი ნებით შევიდა გახურებულ ღუმელში და უფალს შეჰვედრა სული.

◄ გუშინ | დღეს | ხვალ ►