ხომ უნდა ჰქონდეს დედამიწას ლურჯი თვალები - ცასავით ლურჯი... ხომ უნდა ჰქონდეს დედამიწას თეთრი მკლავები - ნისლივით თეთრი... ხომ უნდა ჰქონდეს ბედნიერი წუთების განცდა, იცოდეს ტრფობა, სინანული და სიმწუხარე; თავს შავი ნისლით იმოსავდეს, ავ ფიქრს იხვევდეს, ხან წუხდებოდეს, როგორც კაცი, რაღაცის გამო გულქვაობდეს, მოუსვენრობდეს; ხან უხაროდეს, ხან ადარდებდეს, ხან სიმშვიდე იპყრობდეს მის გულს. სურვილი... სწრაფვა... მოუსვენრობა... ეს ყველაფერი დედამიწას ხომ უნდა ჰქონდეს. ხომ უნდა გრძნობდეს, რომ დავდივარ მე მის ბეჭებზე, მინდობილი ვარ ცის სიღრმეში მიწის სიმყარეს, რომ ჩემი ძვლებიც მიწად უნდა მოიქცეს ბოლოს, სხვა უნდა შედგეს ჩემს სხეულზე - როგორც მიწაზე; ხომ უნდა გრძნობდეს დედამიწა, ხომ უნდა გრძნობდეს... თავის თავის და ჩემი განცდა ხომ უნდა ჰქონდეს. ხომ უნდა გრძნობდეს ჩემს მარტოობას, ჩემი სიმღერით გალობდეს ცაში... ჩემი სიხარული უხაროდეს, ჩემი სიმარტოვით მარტოობდეს, ჩემი სადარდელი ადარდებდეს, ჩემი სატკივარი აღონებდეს, თავი მუდამ ჩემს თავს აგონებდეს, ეს განცდა არასდროს აღონებდეს. * დაიშრიტება ჩემს თვალებში ზეცის ნათელი, წამიერია მისი ნათება. ჩადგება სისხლის მიმოქცევა ჩემს წვრილ ძარღვებში, თეთრ ძვლებზე ხორცის სამოსელი შემომაცვდება; გული გაჩერდება, სუნთქვა შემიწყდება თვალებში ყველაფერი ერთად გაბაცდება... ჩემთვის განკუთვნილ სამანს გადავივლი, ერთხელ მოსახდენი, არა, არ ამცდება. წავალ და იმედით მიწად მოვიქცევი, ვიცი, ჩემ მაგიერ მიწა აყვავდება, მიწა დაინახავს ამ ზეცის სილურჯეს, მიწას ჩემი მზერა არ დაეკარგება. მიწა ისუნთქავს ჩემ მაგიერ ამ წმინდა ჰაერს, მიწა ილივლივებს ამ ზეცის ნათელში, მიწის სისხლძარღვებში სისხლი იჩუხჩუხებს - იდენენ წმინდა მდინარეები. მიწა უყურებს ჩემ მაგიერ ვარსკვლავთა ჟივჟივს, დილაადრიან პირს ჩამოჰბანს ზეცის ცვარ-ნამი... ო, მიხარია, მეც რომ ერთ დროს მიწად ვიქცევი და ამ თეთრ ნისლებს, როგორც მკლავებს, გულზე დავიწყობ! და რადგან შემოქმედმა მიწად მომაქცია, და რადგან ჩემი ბედი მის ბედს დაამთხვია, და რადგან ჩემეული მიწას აურია, მიწაც ხომ როდისმე სამანს გადაივლის და სხვად მოიქცევა... სხვა სახით უყურებს ამ ზეცის სილურჯეს, მის ცისფერ თვალებში სხვა მზერა ჩადგება... და გთხოვ, შემოქმედო, მანამ ეს მოხდება, მანამდის თავისი ჟამი არ მოუვა: მე მინდა ჰქონდეს დედამიწას ლურჯი თვალები! მე მინდა ჰქონდეს ბედნიერი წუთების განცდა!