სიყვარულზე მინდა გითხრათ, ჩემო კარგებო და ჩემო სულიერო შვილებო - ქრისტეს მიერ სულიერო შვილებო.

      ხშირად ისმის ხოლმე კითხვა, თუ რა არის სიყვარული, რა გრძნობაა? ამის თაობაზე ძალიან მარტივად ბრძანა უფალმა: როგორც მე თქვენ შეგიყვარეთო, თქვენ ერთმანეთი გიყვარდეთო, თქვენო - ერთმანეთიო... ადამიანს, რომელსაც გააჩნია მეორე ადამიანის სიყვარული, და სხვა ადამიანები არ უყვარს - სიყვარული არ გააჩნია, მას მხოლოდ თავისი თავი უყვარს, იმიტომ, რომ მარტო იმ ადამიანისგან გრძნობს ბედნიერებას. მას ადამიანის ფენომენი არ უყვარს.

      სიყვარულს არა აქვს ეგოიზმი... აი, მაგალითად, რა არის შედევრი? შედევრი იქმნება ყველასთვის, შედევრი მაშინაა, როდესაც შენი ჰქმნი და შენი შემოქმედება ყველასია. ანუ, ღმერთმა მოგცა ნიჭი და გააკეთე და ყველას ეკუთვნის. თუნდაც პოეზია, თუნდაც ხელოვნების ნებისმიერი დარგი. შემოქმედებაა ყველას რომ ჩუქნი, შენ რომ გიყვარს და სიყვარულით აკეთებ... აი, მაგალითად, გადმოცემა ჯოკონდაზე - ერთ-ერთი ვერსიის მიხედვით ლეონარდო და ვინჩის ერთი იტალიელი აზნაურის ქალი მოეწონა, დახატა და ნახატი ქალის ქმარს გაუგზავნა, და ქმარმა ის დაიწუნა და მხატვარს უკანვე გამოუგზავნა... მაგრამ შედევრი შეიქმნა და საფუძველი იყო სიყვარული...

      აი, თუნდაც მარგარიტა, ნიკოსი... ფიროსმანისა - ნასვამმა დაინახა, რომ ვიღაც "ფრაცუჟანკა" ცეკვავდა... თუ რა ვიცი, როგორც არის ისტორია, მაგრამ სიყვარულმა იფეთქა!!!... და მან მთელი ნახატები გაყიდა და ურემზე დადო!... "ფრანცუჟანკას" კი არ გაუგზავნა, ქალს კი არ გაუგზავნა... როგორ ვთქვათ, რომ ნიკომ მარტო ქალს გაუგზავნა... ჩემი აზრით, მან სიყვარულს გაუგზავნა...

      დაილოცოს სიყვარული, რომელსაც ზღვარი არა აქვს, არა აქვს ჩარჩო... არაფერი არ გააჩნია... სიყვარული ეს ყველას ეკუთვნის! შენ თუ ამბობ რომ მარტო შენი ახლობელი ადამიანი გიყვარს და სხვა არავინ, ესე იგი შენ სიყვარული კი არა, შენ ახლობელი კი არა, შენი დაცემული ბუნების შევსება გიყვარს!... შენ გიყვარს შენი დაცემული ბუნების შევსება, რათა რაღაც მომენტში კარგად იგრძნო თავი.. სიყვარული საზღვრებს სცდება!... როგორც შემოქმედება, რომელიც ასევე ყველა საზღვარს სცდება. სიყვარულს ზღვარი არა აქვს, არც არაფერი გააჩნია...

      მე ერთს გისურვებდით_ ისეთი სიყვარული გქონოდეთ, რომ იმ სიყვარულისათვის თავი დაგედოთ - სუფთა, მოყვასის სიყვარული გქონოდეთ და ჩათვალეთ, რომ თქვენ ქრისტე ღმერთი გიყვართ!... მე ჩემს თავს ვეკითხები ხოლმე, გაქვს სიყვარული თუ არა? ჯერ არა, ეტყობა ჯერ არა მაქვს მეთქი, ესე ვპასუხობ ვისაც სიყვარული აქვს, ის თავს დადებს. ვისაც სიყვარული აქვს ის ეძიებს მისთვის თავის დადებას. თქვენ რომ დამინახავთ, რომ მე სიყვარულისთვის თავის დადებას დავიწყებ, მე სიყვარული მექნება... მე ჯერ ის არა მაქვს, რაც უნდა მქონეს, ჯერ უკმაყოფილო ვარ ჩემი თავით. იცით რა არის ნამდვილი სიყვარული? მე აი, ამისთვის, ამისთვის, ამისთვის თუ დავიწყებ ძიებას თავის დადების... მე მაშინ თქვენ მეყვარებით... დანარჩენი შოუა და მე არ მინდა შოუში ვიყო...

      ვახტანგ გორგასალმა თქვა, ეძიებდეთო ქრისტესთვის სიკვდილს!!! ეს ნიშნავს რომ - მოყვასისთვის და თუ მოყვასის სიყვარულია მცნება თანასწორი ღმერთისა, დაე, ვეძიოთ მოყვასისათვის თავის დადება... ეს არის ნამდვილი სიყვარული... თუ ოდესმე ღმერთი მაჩუქებს, და მე ვიცი რომ მაჩუქებს, იმიტომ რომ მჯერა, იმიტომ რომ მე ვთხოვ - მე ვერ მივაღწევ... მე ვერ, მაგრამ აი, თუ ღმერთი მომცემს. მე უზომოდ ბედნიერი ვიქნები...

      თუ შენ ჭეშმარიტად გეყვარება ადამიანი, არა მარტო არა მარტო ახლობლები არამედ თვითონ ადამიანი, ბედნიერი ხარ...

      ძალიან მარტივია იმ კითხვის ამოხსნა თუ რა არის სიყვარული- სიყვარულია ის რა სიყვარულიც ჩვენ დაგვიტოვა ქრისტემ, როცა ბრძანა - ღმერთი გიყვარდესო და შენნაირი ადამიანი... იცი, რა დროს გვეყვარება ერთმანეთი? როცა ჩვენ აღარავის განვიკითხავთ, არავიზე ცუდს არ ვიტყვით.. უბრალოები ვიქნებით....

      სიყვარული ანიჭებს ყოველგვარ კურნებას... ყველას ვუსურვებდი ისეთი სიყვარული მოგვცეს ჯვარცმულმა მაცხოვარმა, რომ რაც ტკივილი და დარდი გვაქვს, რაც გლახები ვართ ამ სიყვარულს განვეკურნებინეთ!!! დალოცვილ იყოს სიყვარული, რომელსაც გააჩნია კურნების ძალა... და ეს კურნება... მიმეღოს მე პირადად, რომელსაც მჭირდება, და ყველას თითოეულ ჩვენთაგანს.