მართლია შაბათია, მაგრამ ქველინიუსი მაინც გადის, რადგან წლის ბოლოა და ბოლო დღეების ნიუსები შესაძლოა ერთობ მნიშვნელოვანი იყოს. დღესასწაულები განსაკუთებით გზებზე იგრძნობა ხოლმე, დღესაც ასე იყო, როდესაც ცენტრალური მაგისტრალის ხაშურის მონაკვეთზე თვალუწვდენელი საცობი შეიქმნა. ახალი წლის სამზადისში ქალაქის მერიაც ჩართულია - ახალი წლის ღამეს მეტრო, ავტობუსები და საბაგირო მოქალაქეებს უფასოდ მოემსახურება. რაც შეეხება სხვა ამბებს, შსს მინისტრი იყო აქტუალური, ხანძარი და პანკისელები. ასევე, დღის ამბავია, საზ.მაუს გადაწყვეტილება დახუროს ევროპის ბიურო.

საქართველოს და მსოფლიოს ამბები / 30 დეკემბერი, 2017/

      გიორგი გახარია არასამთავრობო სექტორის წარმომადგენლებს შეხვდა. ნათია მეზვრიშვილი - არასამთავრობო სექტორთან შეხვედრაზე საუბარი იყო საპოლიციო კონტროლის მარეგულირებელი კანონმდებლობის გადახედვაზე. სოფიო ვერძეული - რატიანის საქმეზე საქალაქოს გადაწყვეტილებას სააპელაციო წესით გავასაჩივრებთ. ეკა გიგაური - მესამე სექტორი დაინტერესდა, რა ხედვები აქვს შს მინისტრს დამოუკიდებელი საგამოძიებო მექანიზმის შექმნასთან დაკავშირებით. სოფიო ვერძეული - შს მინისტრთან და მის მოადგილეებთან შეხვედრაზე პოლიციაში ძალის გადამეტების პრობლემაზე ვისაუბრეთ. ეკა ბესელია ზვიად რატიანის საქმეზე - გამოძიების ობიექტურად ჩატარება მნიშვნელოვანია და ამ პროცესს ყურადღებით ვაკვირდებით.

      ხანძარი თბილისში - ზუბალაშვილების ქუჩაზე გაჩენილი ხანძრის შედეგად, ადვოკატთა ასოციაციის ოფისის სხვენი დაიწვა. დავით ასათიანი - ხანძრის გამომწვევ მიზეზებს გამოძიება სწავლობს, ყველა ძირითადი დოკუმენტაცია გადარჩენილია. ადვოკატთა ასოციაციის თავმჯდომარე სახანძრო– სამაშველო სამსახურს მადლობას უხდის.

      ექიმი - სპეცოპერაციისას დაჭრილი თემირლან მაჩალიკაშვილის ჯანმრთელობის მდგომარეობა გაუარესდა. ირაკლი ქადაგიშვილი - უხუცესებს ინფორმაცია მივაწოდეთ პანკისის ხეობაში ჩატარებული სპეცოპერაციის შესახებ. პანკისის ხეობის უხუცესთა საბჭოს წევრი - ჩვენ გვინდა, დროულად და ობიექტურად გამოიძიონ სპეცოპერაციის საქმე.

      მიხეილ ჯანელიძემ ქართულ დიასპორას დამდეგი დღესასწაულები მიულოცა. სოფიო ქაცარავა - მომავალ წელს ჩვენ კვლავ გავაგრძელებთ შედეგზე ორიენტირებული საგარეო პოლიტიკის განხორციელებას. 31 დეკემბრიდან 2 იანვრამდე ე.წ სამხრეთ ოსეთის ადმინისტრაციული საზღვარი ჩაიკეტება.

      პრეზიდენტი - როდესაც შენი პოლიტიკა, აკრძალვები და სიმკაცრეები უკეთეს შედეგს არ გაძლევს, ჯობია მოხსნა და ადამიანები თავისუფლები იყვნენ.

      კახა კახიშვილი არ იზიარებს მოსაზრებას, რომ ციხე უნდა იყოს გამოსასწორებელი მანქანა სადამსჯელო ელემენტებით.

      დაკავებული უკრაინელი - ირინა სავიცკაიას საექსტრადიციო პატიმრობა სამი თვით გაუხანგრძლივდა.

      სახალხო დამცველი სამუშაო ადგილებზე დაღუპვის ფაქტების გახშირებას სისტემურ პრობლემად მიიჩნევს.

საზღვარგარეთულები:

      მიხეილ სააკაშვილი დარწმუნებულია, რომ პეტრო პოროშენკოს პრეზიდენტობის პერიოდში უკრაინის მოქალაქეობის დაბრუნებას ვერ შეძლებს.

      ისრაელმა იუნესკო-ს მისი შემადგენლობიდან გასვლის შესახებ ოფიციალურად შეატყობინა.

      დიდი ბრიტანეთი „ფეისბუქსა“ და „ტვიტერს“ სანქციებით ემუქრება.

      ოკუპირებული სამხრეთ ოსეთის ე.წ. მესაზღვრეებმა საქართველოს მოქალაქე დააკავეს.

      ვლადიმერ პუტინმა დონალდ ტრამპს ახალი წელი მიულოცა.

      ეგვიპტეს ყოფილ პრეზიდენტს მუჰამედ მურსის სამი წლით თავისუფლების აღკვეთა მიესაჯა.

      საუდის არაბეთის ორი პრინცი პატიმრობიდან გათავისუფლდა.

      აზერბაიჯანული მედია - მილი-მეჯლისის დეპუტატებმა გიორგი კვირიკაშვილის ინიციატივის თაობაზე უკმაყოფილება გამოხატეს.