საინფორმაციო დღე შუადღიდან დავიწყოთ ამჯერად, კვირის დასასრულია და ნელ-ნელა შევავსოთ მთელი დღის თუ კვირის ნიუსებით. პირველი და მნიშვნელოვანი - მართლმადიდებელი ეკლესია დღეს უფლის წინამორბედისა და ნათლისმცემლის, წმიდა იოანე წინასწარმეტყველის შობის დღეს აღნიშნავს (წაიკითხეთ დღესასწაულის შესახებ). აქვე იმასაც გეტყვით, რომ ხვალიდან გამოდარებაა პროგნოზირებული.

საქართველოს და მსოფლიოს ამბები /7 ივლისი, 2017/

      ბოლო დღეების წვიმებს, როგორც ხდება ხოლმე, კარგი არაფერი მოჰყოლია - გადაუღებელი წვიმის შედეგად, ადიდებულმა მდინარე ჩვეშურმა ონის რაიონში სოფელ ღებსა და გონასთან დამაკავშირებელი გზა წაიღო. მცხეთა-სტეფანწმინდა-ლარსის საავტომობილო გზაზე, სოფელ გვრიტოსთან შვავის ჩამოსვლის შედეგად საავტომობილო გზა ჩაიკეტა. წვიმის შედეგად ხევებიდან ღვარცოფული მასის გამოტანის გამო, ჟინვალი-ბარისახო-შატილის საავტომობილო გზაზე ტრანსპორტის მოძრაობა აიკრძალა.

      ვისაც დაავიწყდა შევახსენებთ, რომ საქართველოში ამერიკის ვიცე-პრეზიდენტის ვიზიტია დაგეგმილი. იქამდე კი ჩვენ ვართ ამაყი, რომ თქვენთან ერთად ვემსახურებით თავისუფლების, დამოუკიდებლობის, ადამიანის ღირსების ღირებულებებს, - ასე მიმართა გიორგი მარგველაშვილმა აშშ-ის ელჩს, აშშ-ის დამოუკიდებლობის დღისადმი მიძღვნილ საზეიმო მიღებაზე. ამერიკის ტრფიალებაზე, კიდევ ერთიც - გიორგი კვირიკაშვილი - ამერიკა იყო და არის საქართველოს დემოკრატიული განვითარებისა და ეკონომიკური აღმავლობის ყველაზე ერთგული მხარდამჭერი. იან კელი - პრემიერ-მინისტრმა განაცხადა, რომ გააგრძელებს რეფორმებს და ჩვენ ამას მხოლოდ მხარს ვუჭერთ.

      ციანიდის საქმის განხილვა, დღეისთვის იყო ჩანიშნული. დღეს დაიკითხნენ ოქრომჭედლები, რომლებიც როგორც ნატრიუმის, ისე კალიუმის ციანიდის ოქრომჭედლობაში გამოყენებას გამორიცხავენ. მიხეილ რამიშვილი - იმ ოქრომჭედლების ნამუშევრებს, რომლებიც ციანიდს არ იყენებენ, არ უნდა ენდოთ. პროკურორი - ბრალდებულ მამალაძის განმარტება, თითქოს ოქრომჭედლისთვის სჭირდებოდა ციანიდი, არ დადასტურდა. სამაგიეროდ, გველის შხამზე ადვოკატები მოწმის ჩვენებას იშველიებენ - დეკანოზი ჩვენებაში ამბობდა, რომ შორენა თეთრუაშვილის თხოვნით, ვინაიდან მას სჭირდებოდა მალამოსათვის, კითხულობდა ამას. იმ თანამშრომელმა თქვა, რომ დიახ, ამ თემაზე მოვიდა და იგივე დაადასტურა. უფრო მეტიც, თქვა, რომ გველის შხამი არაერთ სხვადასხვა მალამოში გამოიყენება და სააფთიაქო წარმოებაშიც არის გავრცელებულიო", - განაცხადა გიორგი ფანცულაიამ.

      აქამდე მუხთარლი ახლა უკვე მისი ცოლია დაწინაურებული ნიუსებში - ლეილა მუსტაფაევა მასზე შესაძლო თვალთვალის ფაქტის დროულად გამოძიებას ითხოვს. ადვოკატი - სტრასბურგის სასამართლომ საქმეს ”აფგან მუხთარლი საქართველოს და აზერბაიჯანის წინააღმდეგ” პრიორიტეტი მიანიჭა. აფგან მუხთარლის მეუღლე - გვიჩნდება ეჭვი, რომ პოლიციას მომხდარი ინციდენტის გამოძიება არ სურს.

      კონსტიტუციაზე ახალი იდეები მუშავდება - გიგა ბოკერია - თუ ხელისუფლებას ახალი წინადადება აქვს, არსებული პროექტი უნდა გამოიწვიოს და შემდეგ ოპოზიციური პარტიები ვიმსჯელებთ, სად შეიძლება იყოს კონსენსუსი. არასამთავრობოები ოპოზიციონერ დეპუტატებს მიმართავენ, თვითმმართველი ქალაქების გაერთიანების შესახებ გადაწყვეტილება საკონსტიტუციო სასამართლოში გაასაჩივრონ. პრეზიდენტის ადმინისტრაცია საკონსტიტუციო პროექტთან დაკავშირებით კონსენსუსის მისაღწევად მხარეებს ორშაბათს შეხვედრას სთავაზობს. „ევროპული საქართველო“ პრეზიდენტის ადმინისტრაციის მიერ შეთავაზებულ დიალოგში მონაწილეობის მიღების მზადყოფნას გამოთქვამს. ირმა ნადირაშვილი - მმართველი ძალა უნდა ჩამოყალიბდეს, ისევ განაგრძობს სპექტაკლს, თუ არის პოლიტიკური ნება, გაუმჯობესდეს კონსტიტუცია.

      კანონის მიღება უჭირთ, მაგრამ შეხვედრების გამართვა არა - საქართველოს საპარლამენტო დელეგაციამ მინსკში ორმხრივი შეხვედრები გამართა.

      ექსპერტული აზრებიც მოვისმინოთ მერობის ამბებზე - ხათუნა ლაგაზიძე - ოპოზიციამ მთავარი შეცდომა უკვე დაუშვა, რადგან ვერ მოახერხა ერთ კანდიდატზე შეჯერება. ზაალ უდუმაშვილის საარჩევნო შტაბს გრიგოლ ვაშაძე უხელმძღვანელებს. გრიგოლ ვაშაძე - ვისაც მობეზრდა იმ მინდორზე ცხოვრება, რომელიც ენძელებითაა მოფენილი და გუგულები და გედები ბუდობენ, ხმას მისცემს „ნაციონალური მოძრაობის“ კანდიდატებს.

      თბილისში მიწებს ასხვისებდნენო, ეს რა მესმის - საია - კვლევის თანახმად იკვეთება, რომ 2008 წელს სახელმწიფომ კანონდარღვევით გაასხვისა გარკვეული ტერიტორია, მათ შორის, ე.წ. ალიევის სკვერის ნაწილი.

      რამდენიმე კვირაა, ამერიკაში ქართველი სპორტსმენია დაკავებული - ავთანდილ ხურციძე - ამდენ მკვლელებსა და ნარკომანებში ერთი უმწიკვლო ბიჭიც ხომ უნდათ, კი გამოვეცხადე ანჩისხატივით.

      სპორტმა ფეხბურთის მიმართულებით, ტრადიციას არ უღალატა და გვაწყენინა - ევროპალიგას სამივე ქართული საფეხბურთო კლუბი გამოეთიშა.

      ჩვენს ვაზს უკვე თავისი საკოლექციო მონეტაც ექნება - ეროვნული ბანკი ქართული ვაზის თემაზე შექმნილი საკოლექციო მონეტის რეალიზაციას იწყებს.

      საგნები რომლებიც არ უნდათ რომ ასწავლონ თუ როგორც არის - განათლების სამინისტროსთან საგნების - ”მე და საზოგადოება” და ”ჩემი საქართველოს” სკოლებში შეტანის წინააღმდეგ საპროტესტო აქცია გაიმართა.

      იმდენი ტურისტი ჩამოვიდა, რომ უკვე იკარგებიან და პრობლემა არ არის? - კასპში, მაშველები ოთხ ადამიანს ეძებენ, რომლებიც, სავარაუდოდ, ტურისტები არიან. კასპის გარდა, 5 ტურისტს ხევსურეთშიც ეძებენ.

საზღვარგარეთულები:

      ჰამბურგში დღეს ტრამპ-პუტინის შეხვედრა შედგება - ანგელა მერკელი არ მიიჩნევს, რომ პუტინსა და ტრამპს შორის შუამავლის როლი უნდა იკისროს. ასევე ჰამბურგში - დღეს ჰამბურგში რექს ტილერსონის და სერგეი ლავროვის შეხვედრა გაიმართება. დონალდ ტრამპი - მოუთმენლად ველოდები ვლადიმერ პუტინთან შეხვედრას, ყალბი სიახლეების მედია არასოდეს გამაშუქებს სწორად, მაგრამ ეს ვის აღელვებს. დონალდ ტრამპი „დიდი ოცეულის“ სამიტზე პუტინთან შეხვედრის გამო, კლიმატის ცვლილების საკითხზე სხდომას არ დაესწრება.

      ჰამბურგი მსოფლიო ლიდერებს მასპინძლობს - ჰამბურგში „დიდი ოცეულის“ ქვეყნების ლიდერები შეიკრიბნენ. „დიდი ოცეულის“ სამიტზე, ვლადიმერ პუტინი და დონალდ ტრამპი ერთმანეთს მცირე ხნით გაესაუბრნენ. ჰამბურგში პოლიციამ მანიფესტანტების წინააღმდეგ ცრემლსადენი გაზი და წყლის ჭავლი კიდევ ერთხელ გამოიყენა. შეგახსენებთ, G20-ს ჰამბურგელები მაინცდამაინც დიდი სიყვარულით არ შეხვედრიან.

      ეგვიპტეში თავდასხმის შედეგად 10 სამხედრო და 40 ტერორისტი დაიღუპა.