მესიზმრა საზღაპრო რთველი დიდებული:

მთელი საქართველო ვაზს გადაებურა.

და თუმცა სიზმარში ქვა ქვაა, ხე ხეა, -

ლიცლიცა ყურძენი სკასავით ეხვია.

მტევანზე მტევანი,

ფოთლზე ფოთოლი,

კურდღლის ყურებივით გრძელ-გრძელი, ტოლ-ტოლი.

ჭებშიაც ეკიდა მტევნები ჯაგნური,

ვით შოთის პურები, თონეში ჩაკრული.

ყურძენი - თაფლი და სარაჭი -

პირდაპირ სარაჭე.

სოროშიც, ბუდეშიც მტევანი ბარტყობდა...

საცქერად რად ღირდა მარტო თხა.

წვერი ეკიდა აკიდოსავით

და ყელზეც ყურძნის კრიალოსანი.

ვენახის სული!

ვაზის ემბლება!

პირჯვარს იწერდა მწყემსი ეფრემა...

ვაზი ისე მოისხა

მესერმაც და შეშამაც,

ვეღარავინ იტყოდა: "თხამ ვენახი შეჭამა".

- ამდენი ყურძენი სად უნდა დავტიოთ?

აყვირა გაზეთი, დეპეშა, რადიო...

- ნავები,

- ნავები,

- ნავები, მოვზიდოთ,

იქნება გვეშველოს: ზღვა დაშრა კოვზითო.

მაშინვე წამოვხტი და, გითხრათ სიმართლე,

მაშინვე "ხომალდთა კატალოგს" მივმართე.

და, აჰა, ტროადან თუ ილიონიდან

ნუ იტყვით, ნავების რა წარღვნა მოვიდა.

ივსება ქვევრები, კასრები, თაღარი,

ღვინო ჩქეფს, ღვინო დუღს, რა გინდა რა გვარი!

მარტო რომ დავლიოთ, ხომ ამოვწყდებით, -

უნდა დავპატიჟეთ მკვდრებიც, ცოცხლებიც.

ქართველები ვართ -

გვავსვით ნებივრად,

მტრისა და მოყვარის მასპინძლები ვართ.

ქართველი თუ თვრება - მღერის და იცინის,

სხვანი რომ ტირიან, არა ვართ ისინი.

გახურდა ქეიფი, გახურდა, გახურდა,

სტუმრებო, გაფრთხილებთ, ნუ ხუმრობთ კახურთან.

დუელი ყანწების, ჭინჭილის დუელი!

ლხინს რაღა გემო აქვს, ჭინჭყლობას თუ ელი.

- სალამი, აქილევსს!

სალამი, ჰექტორ!

ქიშპობას კარები გადაურაზეთ!

თქვენ მტრები იყავით, ძმობილნო, ერთ დროს,

ახლა იმეგობრეთ ქართულ სუფრაზე.

ღმერთებს და გმირებს გავუთამამდით,

მაგრამ ზრდილობა როდი შეგვშლია,

თვითონ ბახუსი დაჯდა თამადად

და მერიქიფედ ოდისევსია.

სხედან ლაჩრებიც და რაინდებიც:

აქეთ - აფშინა, იქით - მინდია,

გულუხვად ისმის ქება-დიდება -

ქართულ სუფრაზე ყველა დიდია!

არც რაინდობას ეღალატების,

ტირადებს ვამბობთ ლამის ზეპირად.

ქართულ სუფრაზე სულ ტალანტები,

სულ ერთმანეთზე ლამაზები ვართ.

ქართველები ვართ, თორემ სუფრიდან

ბევრი კინწისკვრით გასარეკია.

მეორე ყანწზე დევს აუხირდა,

ისე დაგვითვრა ნაცარქექია.

ამირანს კოცნის უკვე მეხუთედ

ჭინკა ცუღლუტი და აბეზარა,

აგერ კიკლოპიც შემოეყუდა

და მერიქიფეს ფერი ეცვალა.

დასვით, დაუსხით, კიდევ დაუსხით,

ე მანდ ჭინჭილა ეგდო თაროზე.

შენ შეგვეწიე, ღმერთო ბახუსო,

ეგებ დაგვითრო ეგ ტარტაროზი.

ერთი ამ ჭინკებს დაუტატანე

ქვევრი მოხადონ, თუნდ სახაზინო,

ძალმომრეობის ავი ტიტანი,

ოღონდ დაათრონ და მიაძინონ.

ასვით და ასვით,

ასვით გულუხვად,

პოლიფემის ძე, შეხეთ, ძუნძლებს,

მღვრიე ბურუსში მიდის ბუყბუყით,

როგორც დანთქმული ზღვაში კუნძული.

- ეჰეი, ოდისევს - ელადის გმირო,

კიკლოპის დათრობას რა ამაოდ ცდილობ!

აიღე ჭინჭილა - ბახუსის მეტაფორა,

მეტი სიცბიერე,

მეტი აფიორა!

და როცა მავანის გმირობაც გაჰკივლეს,

ქუსლი მოეფხანა აქილევსს,

შუბლი შეჭმუხნა და წარბი ახია,

მაშინვე გაილურსა სუყველა ავყია.

არც კი დაუნახავს დარეჯანის ძეს

ბუხართან მჯდომარეს კენტად,

ამ სოდომ-გომორში

ამდენი ხალხის წინ

ეშმაკი ანგელოსს

თუ როგორ ბწკენდა.

და იყო ლაციცი, ბღვერა და ფიცილი,

არავის უშვებდნენ უკილავს, უქირდავს,

მარტოდენ ბახუსი კვდებოდა სიცილით -

ის ღმერთი იყო და არარა უკვირდა.

გათენდა, გათენდა,

ადგა ბახუსი,

წარმართს ყოვლადწმინდა დავუსხით.

აწვიმს ნათელი, ოქროს ნათელი

მთლად საქართველოს - იმიერს, ამიერს.

ყველა მთვრალია... მხოლოდ ქართველნი

ისევ მღერიან მრავალჟამიერს.

ოდისევსი მყავდა მერიქიფედ,

მე და ოდისევსმა მერე ვიქეიფეთ..

შოთა ნიშნიანიძე

წყარო: "უპირველეს ყოვლისა", შოთა ნიშნიანიძე, გამომც. "საბჭოთა საქართველო", თბ. 1988

ტეგები: Qwelly, ვენახი, ნიშნიანიძე, პოეზია, ღვინო

ნახვა: 521

გამოხმაურებები!

მთელი ოლიმპო იყო საქეიფოდ ჩამოსული საქართველოში :D 

RSS

ღონისძიებები

ბლოგ პოსტები

დაბარებული პრემიერის ვრცელი გამოსვლა, ლუგარის რუსული რევიზია და გამოხმაურებები

გამოაქვეყნა Giorgi_მ.
თარიღი: მაისი 28, 2020.
საათი: 11:25pm 1 კომენტარი

      გილოცავთ ამაღლების დღესასწაულს! დამოუკიდებლობის დღე გადაგორდა თუ არა, კვირის მთავარ ამბად იქცა პრემიერ მინისტრის საპარლამენტო სტუმრობა. ბოლო ორი დღეა ყველა სიახლე ამ სტუმრობის გარშემო იტრიალებდა, რომ არა ჩრდილო მეზობელი და მეორე მთავარი თემა - ლუგარის ლაბორატორიის რუსეთული ჩაკირკიტება. კოვიდ სტატისტიკა - საქართველოში: 738 შემთხვევა, გამოჯანმრთელებული - 573, გარდაცვლილი - 12. მსოფლიოში: დადასტურებული შემთხვევა - 5 929 312, გამოჯანმრთელებული -…

გაგრძელება

დამოუკიდებლობიდან 102-ე წელი!

გამოაქვეყნა Giorgi_მ.
თარიღი: მაისი 26, 2020.
საათი: 10:53pm 2 კომენტარი

      წვიმები წვიმებს მისდევენ მიდიან, მაგრამ ამ სიმღერის გაგრძელება არ გამოვა, რადგან დღეიდან, დაპირებისამებრ გამოიდარა. ახლა მთავარი ამბავი - კორონა უკან დაიხიე! საქართველო დამოუკიდებელია! გილოცავთ დამოუკიდებლობის დღეს! თვის ბოლომდე კოვიდ სტატისტიკა - საქართველოში: 732 შემთხვევა, გამოჯანმრთელებული - 537, გარდაცვლილი - 12. მსოფლიოში: დადასტურებული შემთხვევა - 5 643 071, გამოჯანმრთელებული - 2 408 433, გარდაცვლილი - 349 940, სამკურნალო - 2 990…

გაგრძელება

ჩალის ლუდი

გამოაქვეყნა CSCCA_მ.
თარიღი: მაისი 26, 2020.
საათი: 1:00pm 0 კომენტარი

Animal Crossing New Horizons has been loved by players since its initial release. Players can cultivate and maintain ideal villages on desert islands. In the game, players no longer need to be disturbed by epidemics and can also obtain a considerable number of Animal Crossing Bells in new ways. Players can make handicrafts by shopping. In addition, players can also plant fruit trees to obtain fruit outside the island at a very low price of 500 ACNH Bells. Like the real world, players also…

გაგრძელება

რწმენის ფერადი ადგილები

გამოაქვეყნა Tamila Moshiashvili_მ.
თარიღი: მაისი 24, 2020.
საათი: 9:19pm 1 კომენტარი

      მეჩეთების ფერადოვნებასა და სიჭრელეზე სტატიები არ აკლია ინტერნეტს, მაგრამ ასჯერ გაგონილს ერთხელ ნანახი სჯობსო. ვიდრე პირდაპირ ნახვას შეძლებთ, იქამდე სჯობს კარგი ფოტოგრაფის კარგი ფოტოხელოვნება იპოვოთ - ფატემ ჰოსეინ აღაი (Fatemeh Hosein Aghaei) მეჩეთების სილამაზესა და მრავალფეროვნებას ირანში დაჰყვება. ისპაჰანი ამ მხრივ გამორჩეული ქალაქია ამიტომ ფოტოების უმრავლესობა სწორედ ამ ქალაქიდანაა. სპარსული კულტურა და აღმოსავლური ფერები დღევანდელი…

გაგრძელება

Qwelly World

free counters