გამოხმაურებები!

Permalink Rati Inashvili მაისი 8, 2012 | 8:02pm:

საქართველოს ფეხბურთელთა ეროვნული ნაკრები ავსტრიაში მხოლოდ ერთ ამხანაგურ მატჩს ჩაატარებს.
ფეხბურთის ფედერაციის პრესატაშე ოთარ გიორგაძემ “მსოფლიო სპორტთან” საუბარში დაადასტურა, რომ თემურ ქეცბაიას შეგირდები 21 მაისს ირანს არ შეხვდებიან და 24 მაისს ზალცბურგში თურქეთთან სპარინგით შემოიფარგლებიან.
ეროვნული გუნდი შეკრებას 15 მაისს თბილისში დაიწყებს. ის ლეგიონერები, რომლებსაც მანამდე სეზონი დაუმთავრდებათ საქართველოში ჩამოვლენ, ხოლო დანარჩენები გუნდს ავსტრიაში შეურთდებიან

Permalink Rati Inashvili მაისი 14, 2012 | 8:39pm:

საქართველოს ეროვნული საფეხბურთო ნაკრები 24 მაისს, ზალცბურგში თურქეთის წინააღმდეგ საერთაშორისო ამხანაგურ მატჩს გამართავს. ავსტრიაში ჩასატარებელი შეხვედრისთვის თემურ ქეცბაიამ 22 ფეხბურთელი გამოიძახა. გუნდი ავსტრიაში შეკრებას 16 მაისს დაიწყებს.
შემადგენლობა:
მეკარეები: ნუკრი რევიშვილი, გიორგი ლორია;
მცველები: უჩა ლობჟანიძე, ალექსანდრე ამისულაშვილი, აკაკი ხუბუტია, გურამ კაშია, ზურაბ ხიზანიშვილი, გიორგი ფოფხაძე, საბა კვერკველია;
ნახევარმცველები: მურთაზ დაუშვილი. დავით კვირკველია, თორნიკე ოქრიაშვილი, ალექსანდრე კობახიძე, დავით თარგამაძე, ჯაბა კანკავა, ლევან ყენია, ნიკა ძალამიძე, ჯაბა ლიპარტია;
თავდამსხმელები: ლადო დვალიშვილი. ნიკა გელაშვილი, ოთარ მარცვალაძე, ლევან მჭედლიძე.
სიაში ორი ისეთი ფეხბურთელია, რომლებიც ქვეყნის მთავარ ნაკრებში აქამდე არასოდეს გამოუძახებიათ: “რუბინის” მცველი საბა კვერკველია და “იაგელონიას” ნახევარმცველი ნიკა ძალამიძე.

სფფ-ის პრესსამსახური

Permalink Rati Inashvili მაისი 24, 2012 | 4:38pm:

საქართველოს ეროვნულმა ნაკრებმა, რომელიც ავსტრიაში, დაბა ფლახაუში საწვრთნელ შეკრებაზე იმყოფება, თურქეთთან მატჩისწინა ბოლო ვარჯიში გამართა. ნაკრების თავკაცის გადაწყვეტილებით, გუნდი სავარჯიშოდ ზალცბურგში აღარ წასულა. 24 მაისის ამხანაგური მატჩის შემდეგ, “ჯვაროსანთა“ შეკრება დასრულდება. სფფ-ის ოფიციალური ვებ-გვერდი თემურ ქეცბაიას ესაუბრა. ნაკრების მთავარმა მწვრთნელმა ავსტრიული შეკრება შეაჯამა და მომავალ მატჩზეც ისაუბრა.
- 16 მაისიდან გუნდი ავსტრიაში გადის საწვრთნელ შეკრებას. რამდენად კმაყოფილი ხართ არსებული სიტუაციით და რამდენად მოხერხდა ყველა ფეხბურთელის გამოცდა, ვისი გამოძახებაც გსურდათ?
- შეკრებამ კარგად ჩაიარა. 2010 წლის შემდეგ, პირველად მოხერხდა, რომ ფეხბურთელები ამდენი ხნით გამოვიძახეთ. სასურველი იქნებოდა, უფრო მეტი მატჩი ჩაგვეტარებინა, თუმცა, ეს მხოლოდ ჩვენზე არ იყო დამოკიდებული. თურქეთთან ურთულესი თამაში იქნება. მათ ძალიან საინტერესო ფეხბურთელები ჰყავთ გამოძახებული. ჩვენი ბიჭები სერიოზულად ემზადებიან და დარწმუნებული ვარ, კარგი შეხვედრა იქნება.
- საქართველოს ნაკრები თურქეთს მეხუთედ ხვდება, თქვენი ხელმძღვანელობით კი – პირველად. რა იქნება გადამწყვეტი ამ მატჩში?
- სეზონის ბოლოა და ალბათ, ის გუნდი მოიგებს, ვინც უფრო მოტივირებული იქნება. გასაგებია, ფეხბურთელებმა სეზონი დაამთავრეს და რთულია კიდევ ათდღიანი შეკრების გავლა, მაგრამ ეს ნაკრებია და საქმეს ყველა სერიოზულად მიუდგა. ძალიან კარგი შეკრება იყო და იმედი მაქვს, ეს ყველაფერი შედეგზეც აისახება.
- რამდენიმე ფეხბურთელი გუნდში პირველად მოიწვიეთ. რამდენად კმაყოფილი ხართ მათი მზადებით?
- ახალგაზრდები წინა შეკრებაზეც გვყავდა, თუმცა, იმასთან შედარებით, უკეთეს ფორმაში არიან და კიდევ უფრო მონდომებულებიც. ნაკრებში მოხვედრა ადვილი არ არის. მათ მიეცათ შანსი, ამას იყენებენ და ამით კმაყოფილი ვარ. ვხედავ, რომ ისინი ყოველდღიურად ვითარდებიან. ეს ყველაფერი ძალიან კარგია, რადგან სამომავლოდ უფრო მეტი არჩევანი გვექნება. ჩვენი მიზანია, ახალგაზრდების და საერთოდ, ყველა იმ ფეხბურთელის რესურსი, ვინც ნაკრებში ხვდება, ბოლომდე გამოვიყენოთ. დანარჩენს, ეს ბიჭები თურქეთთან დაამტკიცებენ.
- რამდენად რეალურია მათი გამოჩენა მომავალ შეხვედრაში?
- შეკრებაზე 22 ფეხბურთელია და ჩვენი მოლაპარაკების საფუძველზე, ექვსი შეცვლის უფლება გვექნება. მოედანზე მათი შესვლის საკითხს თამაშის მსვლელობის მიხედვით გადავწყვეტ. დარწმუნებული ვარ, ვინც შეცვლაზე შევა, ყველა საუკეთესო თამაშს აჩვენებს.
- წელს, საქართველოს ნაკრები მეორე ამხანაგურ შეხვედრას ატარებს. არის თუ არა თურქეთი მათ შორის ყველაზე ძლიერი, ვისაც ამხანაგურ მატჩებში შეხვდით და როგორ გააგრძელებს გუნდი 2014 წლის საკვალიფიკაციო ეტაპისთვის მზადებას?
- ოფიციალურ თამაშებში ჩვენ ძალიან ძლიერ გუნდებს შევხვდით. ასევე იყო ამხანაგურ შეხვედრებშიც. პოლონეთი და სლოვენია თურქეთზე ნაკლები გუნდები ნამდვილად არ არიან. თურქეთთან თამაშის შემდეგ, ფეხბურთელები დაისვენებენ, შემდეგ, მსოფლიო ჩემპიონატის საკვალიფიკაციო ეტაპის დაწყებამდე, ერთ ამხანაგურ შეხვედრას 15 აგვისტოს, ლუქსემბურგში, ადგილობრივ ნაკრებთან ჩავატარებთ. სწორედ, იმ თამაშში გამოჩნდება ის ძირითადი შემადგენლობა, რომელიც უკვე ოფიციალურ შეხვედრებში დაიცავს ნაკრების ღირსებას.

P.S. შეგახსენებთ, რომ საქართველოსა და თურქეთის ამხანაგური მატჩი ზალცბურგის “რედ ბულ არენაზე“ დღეს, თბილისის დროით 22:00 საათზე დაიწყება და მის პირდაპირ ტრანსლაციას საზოგადოებრივი მაუწყებლის მეორე არხი აწარმოებს.

Permalink Rati Inashvili მაისი 24, 2012 | 4:39pm:

dges vigeeebt

 

Permalink Rati Inashvili ივლისი 4, 2012 | 5:06pm:

ფიფა-“კოკა კოლას” მიერ გამოქვეყნებულ ივლისის რეიტინგში საქართველოს ფეხბურთელთა ეროვნულმა ნაკრებმა ივნისთან შედარებით მდგომარეობა ორი პოზიციით გაიუარესა და 97-ე ადგილზე დაქვეითდა.
რეიტინგის სათავეში ესპანეთის ნაკრებია, მეორე ადგილზე გერმანია იმყოფება, ხოლო მესამეზე – ურუგვაი.
ფიფა-“კოკა კოლას” ამჟამინდელი რეიტინგის მიხედვით, მსოფლიოს 20 საუკეთესო გუნდის ჩამონათვალი ასე გამოიყურება:
1 (1). ესპანეთი – 1691
2 (3). გერმანია – 1502
3 (2). ურუგვაი – 1297
4 (6). ინგლისი – 1294
5 (10). პორტუგალია – 1213
6 (12). იტალია – 1192
7 (7). არგენტინა – 1095
8 (4). ჰოლანდია – 1079
9 (8). ხორვატია – 1050
10 (9). დანია – 1017
11 (5). ბრაზილია – 1012
12 (15). საბერძნეთი – 1003
13 (13). რუსეთი – 981
14 (14). საფრანგეთი – 980
15 (11). ჩილე – 961
16 (16). კოტ დივუარი – 939
17 (17). შვედეთი – 909
18 (27). ჩეხეთი – 854
19 (19). მექსიკა – 832
20 (23). იაპონია – 829
...74 (75). ფინეთი – 458
...77 (69). ბელარუსი – 447
...97 (95). საქართველო – 357
მსოფლიოს 2014 წლის ჩემპიონატის შესარჩევ ციკლში ესპანეთი, საფრანგეთი, ფინეთი და ბელარუსი საქართველოს ეროვნული გუნდის მეტოქეები არიან.

Permalink Rati Inashvili სექტემბერი 7, 2012 | 12:21pm:

მსოფლიოს 2014 წლის ჩემპონატის შესარჩევ ციკლში 7 სექტემბერს ბელარუსთან გასამართ მატჩის პრესკონფერენციაზე თემურ ქეცბაიამ განაცხადა, რომ მისი მიზანია ბრძოლისუნარიანი გუნდი შექმნას, რომლის ფეხბურთელები მოედანზე გავლენ და ყველაფერს ბოლომდე დადებენ.
თემურ ქეცბაია: ახალი ციკლი იწყება. ძალიან კარგად მოგეხსენებათ, რა ქვეჯგუფშიც ვართ, ძალიან ძნელი თამაშები გველის. ოთხი დღეა ვემზადებით. იმედს გაძლევთ, რომ შედეგის მისაღწევად ბოლომდე ვიბრძოლებთ. ჩვენი მიზანია ფეხბურთელები მოედანზე გავიდნენ და ასი პროცენტით დაიხარჯონ. ამას ითხოვს ქართველი გულშემატკივარი. პრობლემები და ცვლილებები არის, რომლის შესახებ უკვე იცით. ვინც ნაკრებში დარჩნენ ჯანმრთელად არიან.”
- ბელარუსის ნაკრების მთავარმა მწვრთნელმა გეორგი კონდრატიევმა თქვა, რომ საქართველოს გუნდში ვარსკვლავები არ შეუნიშნავს, თქვენ რას იტყვით მეტოქის შესახებ?
- ჩვენ გვინდა გვყავდეს არა ცალკეული ვარსკვლავები არამედ გუნდი, რომელიც გამოვა და ბოლომდე იბრძოლებს. ვარსკვლავებს ვერც მათთან ვხედავ.
- ბელარუსის ფეხბურთმა ბოლო წლებში პროგრესი განიცადა, ბატე ჩემპიონთა ლიგის ქვეჯგუფშიც სისტემატურად ხვდება და ევროპის ლიგის ქვეჯგუფშიც ითამაშა, ეს იმას ნიშნავს, რომ ბელარუსული ფეხბურთი წინ მიდის.
- ბელარუსებს ტრავმირებული გლები არ ეყოლებათ. ბოლო წლებში მისი კარიერა არც ისე წარმატებული იყო, თუმცა გლები უდიდესი ფეხბურთელია და დიდი კარიერა ჰქონდა. ჩვენთვის კარგია, რომ არ ითამაშებს.
- რა შედეგი იქნება თქვენთვის დადებითი?
- დადებით შედეგად მოგება ჩაითვლება. მინდა ბიჭები გავიდნენ მოედანზე და ყველაფერი დადონ, მაგრამ თუ მეტოქე შენზე უკეთესია, თავს ზემოთ ძალა არ არის.
- ნაკრებში მათე ვაწაძე და ჯაბა დვალი გამოიძახეთ, რომლებიც შეკრებაზე არ ჩამოვიდნენ, ასევე გამოძახებული ზურაბ არზიანი...
- ვაწაძე გამოვიძახეთ და ტრავმირებული იყო, პლუს ამას დაემატა ის რომ მან ტრანსფერი განახორციელა და კარგია, რომ უკეთეს ჩემპიონატში გადავიდა. დვალიც ტრავმირებულია. რაც შეეხება არზიანს ის ტრავმირებული კი იყო, მაგრამ ბოლო თამაში ჩაატარა.
- გუნდში სულ ორი თავდამსხმელი გყავთ...
- შე კაი კაცო, ესპანეთის ნაკრებმა ევროპის ჩემპიონატი თავდამსხმელის გარეშე მოიგო.
- როგორი ფსიქოლოგიური განწყობაა გუნდში?
- რამე შეგვატყვეთ, რომ ფსიქოლოგიურად კარგად არ ვართ? ბიჭები ძალიან კარგად არიან განწყობილი.
- რა იქნება საქართველოს ნაკრების გასაღები?
- ჩვენი გასაღები თავდადება და ბოლომდე ბრძოლა იქნება. ჩვენ მოგება გვინდა და ცხადია, უნდა შევუტიოთ, თუ ამის შასი გვექნება.
- განაცხადეთ, რომ აქცენტს მომავალზე აკეთებთ. შეიძლება ითქვას, რომ ლევან კობიაშვილი და ალექსანდრე იაშვილი ნაკრებში აღარ ითამაშებენ?
- ალბათ ჩემი ბრალი იყო, რომ თავიდანვე არ ვუთხარი ბიჭებს, რაც სათქმელი იყო. არ არის ადვილი იყო მწვრთნელი და ერთი ხელის მოსმით უარი უთხრა მათ, ვისთან ერთადაც გითამაშია. მე მინდოდა მეორე მხრიდან წამოსულიყო განცხადება, თუმცა დრო რომ გავიდა, უნდა გამეკეთებინა ის, რაც ქართული ფეხბურთისთვის კარგი იქნებოდა. “იაშკას” ველაპარაკე, “კობის” ვერ დავუკავშირდი. თუ გვინდა, რომ მომავლის გუნდი შევქმნათ, მგონი ლოგიკური გადაწყვეტილებაა, რომ ახალგაზრდა ბიჭებს მივცეთ თავის გამოჩენის საშუალება. უდიდესი მადლობა ამ ბიჭებს იმ წვლილისთვის რაც 20 წლის განმავლობაში შეიტანეს ქართულ ფეხბურთში. ერთ დროს ფეხბურთს ჩვენც ვთამაშობდით, მაგრამ თავის დანებება მოგვიწია. ეს გადაწყვეტილება ადვილი არ იყო.
- კობიაშვილის ვერ დავუკავშირდი, ცოტა უცნაურად ჟღეს... კომუნიკაციის პრობლემა გქონდათ?
- არა, უბრალოდ ორჯერ დავურეკე და არ მიპასუხა. იაშვილსაც დავურეკე, თავიდან არ მიპასუხა, მაგრამ მერე თითონ გადმომირეკა, შეიძლება კობიაშვილი ჩემზე ნაწყენია და ამას ვამართლებ კიდეც, თუმცა მე მწვრთნელი ვარ და გადაწყვეტილებების მიღება მიწევს. ჩვენ წინ უნდა გავიხედოთ.
- ნაკრების გაახალგაზრდავების პროცესი კი მიდის, მაგრამ იმ ფეხბურთელების შემცვლელები, რომლებიც გუნდიდან წავიდნენ ალბათ სრულფასოვანი არ არიან. ნაკრების ფეხბურთელებს რომ გადავხედოთ, წინანდელისგან განსხვავებით, ბევრი არ თამაშობს დასავლეთ ევროპის კლუბებში და ძირითად შემადგენლობებში, სადაც არიან იგივე რუსეთის თუ უკრაინის კლუბებში, ბევრი ვერ ხვდება...
- რაღაც უნდა გავაკეთოთ, რომ გამოვიდეთ ამ პრობლემებიდან. მხოლოდ სირთულეებზე საუბარი საკმარისი არაა. ეს მარტო ფეხბურთელების ბრალი არაა, რაც ჩვენთან ხდება. ერთ და ორ დღეში გუნდს ვერ გავაკეთებთ. მიუხედავად ამისა, ვიღაცას უნდა მივცეთ თავის გამოჩენის საშუალება. ჩვენს ფეხბურთლებს რომ გადავხედოთ, ევროტურნირებზე ჯანო ანანიძე და ჯაბა კანკავა ითამაშებენ.
- მომავალ შესარჩევში ჩვენი გუნდის კოზირი რა იქნება?
- ჩვენი კოზირი გუნდური თამაში იქნება. გუნდი უნდა შევკრათ. კარგია აქცენტის გაკეთება შემტევ და კომბინაციურ თამაშზე, მაგრამ იგივე “ბარსელონას” იქამდე 25 წელი დასჭირდა. საქართველოში იმდენი პრობლემაა, არამარტო ფეხბურთში, არამედ სხვა სფეროებში, რომ ძალიან ძნელია, ფეხბურთი იყოს უმაღლეს დონეზე. აქვე ვიტყვი, ჩვენ არ გვინდა ისეთი გულშემატკივარი, რომელიც მოვა სტადიონზე და ესპანეთს უგულშემატკივრებს. გვინდა ისეთი ქომაგი, რომელიც მოვა და ჩვენ გვიქომაგებს. გასაგებია, არ ვართ ისეთი გუნდი, რომ ჩვენით იამაყონ, მაგრამ სწორედ გაჭირვებაში უნდა დავუდგეთ გვერდით ერთმანეთს.
გარდა ამისა ქეცბაიამ პრესკონფერენციაზე აღნიშნა, რომ ამიერიდან ნაკრებში მხოლოდ ის ფეხბურთელები იქნებიან გამოძახებული, რომლებიც დაძახებისას ჩამოვლენ და მთლიანად გუნდისთვის დაიხარჯებიან.
“მეამაყება კალათბურთელი ზაზა ფაჩულიასი, ის ერთი თვეა ტრავმირებული და ნაკრების გულისთვის ამხელა რისკზე მიდის და გუნდს ეხმარება. ჩვენ სწორედ ასეთი მენტალიტეტის ფეხბურთელები გვჭირდება” – დასძინა ქეცბაიამ.

Permalink ლაშა სექტემბერი 7, 2012 | 12:28pm:

მაინც წავაგებთ რატი... :)))))))

Rati Inashvili said:

მსოფლიოს 2014 წლის ჩემპონატის შესარჩევ ციკლში 7 სექტემბერს ბელარუსთან გასამართ მატჩის პრესკონფერენციაზე თემურ ქეცბაიამ განაცხადა, რომ მისი მიზანია ბრძოლისუნარიანი გუნდი შექმნას, რომლის ფეხბურთელები მ

Permalink George სექტემბერი 7, 2012 | 12:34pm:

Nu ityvi amas Lash-  *teoriuli* shansi gvaqvs ! :))

LsHისა... said:

მაინც წავაგებთ რატი... :)))))))

Rati Inashvili said:

მსოფლიოს 2014 წლის ჩემპონატის შესარჩევ ციკლში 7 სექტემბერს ბელარუსთან გასამართ მატჩის პრესკონფერენციაზე თემურ ქეცბაიამ განაცხადა, რომ მისი მიზანია ბრძოლისუნარიანი გუნდი შექმნას, რომლის ფეხბურთელები მ

Permalink ლაშა სექტემბერი 7, 2012 | 12:35pm:

მომწინდა თორიული ჩემპიონობა, მირაჟული თასები და ა.შ. :)))))

George said:

Nu ityvi amas Lash-  *teoriuli* shansi gvaqvs ! :))

LsHისა... said:

მაინც წავაგებთ რატი... :)))))))

Rati Inashvili said:

მსოფლიოს 2014 წლის ჩემპონატის შესარჩევ ციკლში 7 სექტემბერს ბელარუსთან გასამართ მატჩის პრესკონფერენციაზე თემურ ქეცბაიამ განაცხადა, რომ მისი მიზანია ბრძოლისუნარიანი გუნდი შექმნას, რომლის ფეხბურთელები მ

Permalink Rati Inashvili სექტემბერი 7, 2012 | 11:58pm:

aha xom moviget? esec teoria ))

Permalink Rati Inashvili სექტემბერი 8, 2012 | 10:33am:

52-ე წუთზე, უკრაინული “ილიჩევეცის” 20 წლის ნახევარმცველმა, თორნიკე ოქრიაშვილმა ბელარუსთა საჯარიმოში მასტერკლასი ჩაატარა – ორი მცველი ლამაზად გააბითურა, “კაცი კაცსა შემოსტყორცნა” და ულამაზესი გოლი შეაგდო. ეს იყო ერთობ დაძაბული მატჩის გვირგვინი, რომელმაც “ჯვაროსნებს” ახლადდაწყებულ შესარჩევ ციკლში პირველი გამარჯვება მოუტანა.
თამაში დაახლოებით ისეთი გამოდგა, როგორსაც ველოდით. მინდორზე ერთმანეთის პირისპირ თანაბარი კლასის გუნდები ირჯებოდნენ და პატარა წვრილმანსაც შეეძლო მატჩის ბედი გადაეწყვიტა.
თემურ ქეცბაიამ დაცვაში მარჯვნივ კაშია, მარცხნივ გრიგალავა, შუაში კი ხიზანიშვილ - ამისულაშვილის დუეტი გაამწესა, რომლებიც, სხვათა შორის, ჩინებულად გაისარჯნენ. საყრდენ ნახევარმცველებად კანკავამ და დაუშვილმა ითამაშეს, მათ მარჯვნიდან თარგამაძე, მარცხნიდან კი ოქრიაშვილი ეხმარებოდნენ, წინ, გამოკვეთილი ფორვარდი მჭედლიძე იყო, ხოლო ანანიძე მის უკან ირჯებოდა.
სტუმართაგან განსაკუთრებით, ნატურალიზებული ბრაზილიელი - რენან ბრესანი და რუსული “კრილია სოვეტოვის” შემტევი - სერგეი კორნილენკო გამოირჩეოდნენ. პირველი ტაიმი, განსაკუთრებით მისი ბოლო 10 წუთი, ბელარუსებმა უკეთ ჩაატარეს და ცოტა იღბალიც რომ ჰქონოდათ, აუცილებლად გაგვიტანდნენ. განსაკუთრებით სახიფათო 39-ე წუთზე განხორციელებული კომბინაცია გახლდათ, როცა ბრესანმა, შეცვლაზე ახლადშესული სიარჰეი ბალანოვიჩი გამოზომილი პასით საჯარიმოში მოძებნა და მისი დარტყმული ცარიელი კარიდან კაშიამ მოიგერია. მალევე, იმავე ბრესანმა უკვე ანტონ პუტილო გაიყვანა ჩინებულ პოზიციაზე, მაგრამ გერმანული “ფრაიბურგის” შუახაზელმა ბოლო მომენტში ვერ ივარგა. მერე ისევ პუტილო ურტყამდა, მაგრამ ბურთი კარს ზემოდან გადასცდა. აი, ეს იყო ბელარუსთა ყველაზე დასამახსოვრებელი ეპიზოდები და ცოტა მაღალი კლასი რომ ჰქონოდათ, ალბათ, მატჩის ბოლოს ტაბლოზე სულ სხვა ანგარიში ენთებოდა. თანაც, ისიც უნდა აღინიშნოს, რომ ნახევარი საათის შემდეგ, მათ ორი მოთამაშის იძულებითი შეცვლა მოუწიათ.
თავის მხრივ, რამდენჯერმე მასპინძლებმაც გამოაჩინეს ბრჭყალები. მე-5 წუთზე კაპიტანმა კანკავამ დაჰკრა ძლიერად, ბურთმა ზემოდან გადაუფრინა ვერემკოს კარს. მერე ანანიძემ ჩააწოდა მარცხნიდან საჯარიმო შორეულ ძელთან, მეკარის ბაქანთან მჭედლიძემ თავით დაუგდო ამისულაშვილს, მაგრამ ხიფათი ამით ამოიწურა. 38-ე წუთზე კი თარგამაძის საფირმო რეიდიც ვიხილეთ. დათო ორ მცველს ოსტატურად დაუძვრა და კუთხური “მოინადირა”.
მე-2 ტაიმი “ჯვაროსნებისთვის” იღბლიანად დაიწყო. ოქრიაშვილის გოლზე უკვე მოგახსენეთ და გაშვებულმა ბურთმა ბელარუსებს თითქოს ფრთები შეუკვეცა - ნაკლებ აქტიურები გახდნენ. ჩვენებმა კი პირიქით, 2-3 წუთიანი რაღაც შტურმის მაგვარი მოუწყვეს სტუმრებს. ოქრიაშვილზე კიდევ გვინდა დავამატოთ. 56-ე წუთზე მინდორზე კვირკველია შემოვიდა და ნახევარდაცვის მარცენა ფრთაზე დაიკავა ადგილი, თორნიკემ კი მარჯვნივ გადმოინაცვლა და ასევე აქტიურად განაგრძო მეტოქე მცველების შეწუხება. ყოჩაღ. ამიტომაც იყო, როცა ბოლოსკენ სირბილაძით შეცვალეს, გულშემატკივარმა მადლობის ტაშით გააცილა.
მოკლედ, პირველი 3 ქულა მოვიპოვეთ. ახლა ესპანელთა სტუმრობის ჯერია და როგორც იტყვიან - გამაგრდით ბიჭებო!


საქართველო – ბელარუსი 1:0
თბილისი. “დინამო არენა.”
საქართველო: ლორია, ოქრიაშვილი (სირბილაძე 83), გრიგალავა, კაშია, ამისულაშვილი, ხიზანიშვილი, კანკავა, დაუშვილი, თარგამაძე, ანანიძე (გორგიაშვილი 75), მჭედლიძე (კვირკველია 56)
მწვრთნელი: თემურ ქეცბაია
ბელარუსი: ვერემკო, კულჩიი, მარტინოვიჩი, კორნილენკო, ნეხაიჩიკი (ბორდაჩოვი 30), პუტილო, ჟავრენჩიკი (ბალანოვიჩი 34), ბრესანი, პოლიაკოვი, ტიგორევი (დრაგუნი 62), ვერხოვცოვი
მწვრთნელი: გეორგი კონდრატიევი
გოლი: ოქრიაშვილი (52)
გაფრთხილება: კანკავა (30), ლორია (86); მარტინოვიჩი (54)
მსაჯი: სტანისლავ ტოდოროვი (ბულგარეთი)

Permalink ლაშა სექტემბერი 8, 2012 | 2:39pm:

ჰო... ეს გოლი მეც ძალიან მომეწონა... :))))))) 

Rati Inashvili said:

52-ე წუთზე, უკრაინული “ილიჩევეცის” 20 წლის ნახევარმცველმა, თორნიკე ოქრიაშვილმა ბელარუსთა საჯარიმოში მასტერკლასი ჩაატარა – ორი მცველი ლამაზად გააბითურა, “კაცი კაცსა შემოსტყორცნა” და ულამაზესი გოლი შეა

• ‹ წინა
• 1
• 2
• 3
• შემდეგი ›
• გვერდი