17 ოქტომბერს ქ.კასპში აღინიშნა სახალხო დღესასწაული "კასპობა 2015". ასეთი ტიპის დღესასწაული რამდენიმე ათეული წელია არ ჩატარებულა სააკაძის, კარბელაშვილების, ჯავახიშვილების, მაზნიაშვილების სამშობლოში. "კასპობა 2015" სწორედ იმიტომ იყო გამორჩეული, რომ ეს მივიწყებული დღესასწაული აღდგა, აღორძინდა და რაც მთავარია ტრადიციად დამკვიდრდა და იმედს ვიტოვებთ, რომ ყოველწლიურად გაიმართება.

      ღონისძიებაში ჩართული იყო მუნიციპალიტეტის ყველა ადმინისტრაციული ერთეული. თითოეული მათგანი წარმოდგენილი იყო სანახაობითი, სადღესასწაულო პროგრამით. ღონისძიებას ალამაზებდა ფოლკლორული ჯგუფების მიერ წარმოდგენილი ცეკვისა და სიმღერის ნომრები, მინი სპექტაკლები და მიუზიკლები. ყველაზე გახარებულები პატარები იყვნენ, მათთვის მრავალი გასართობი შოუ დაიდგა. ქალაქში იგრძნობოდა სილაღე და საზეიმო განწყობა. ამ დღეს მრავალი, დიდი ხნის უნახავი ადამიანი შეხვდა ერთმანეთს. სწორედ ამიტომ არის საჭირო ასეთი ტიპის დღესასწაულები. მაშინ ყველა მხიარული და ბედნიერია. თითქოს ქალაქიც დიდი ხანი ელოდა ამ დღესასწაულს. ის გამოცოცხლდა, გაფერადდა შემოდგომის ფერებში და ამაყად მასპინძლობდა დიდსა თუ პატარას, ადგილობრივსა თუ მოწვეულ სტუმარს.