ზოგადი ცნობები წინასწარმეტყველ იოველის შესახებ

       სახელი იოველი ნეტარი იერონიმეს განმარტების თანახმად ნიშნავს დამწყებს (ბერძ. ა)რხო`მენ...). წიგნიდან ირკვევა, რომ წინასწარმეტყველის მამას ბათუილი ერქვა. იოველის ცხოვრების შესახებ ცნობებს ვერც მის წიგნში და ვერც ბიბლიის რომელიმე სხვა ნაწილში ვერ ვხვდებით. სახელი იოელი წმინდა წერილში რამდენიმეგზის ფიქსირდება, მაგრამ მათგან არავის ხსენებულ წინასწარმეტყველთან კავშირი არ აქვს. მკვლევართა ნაწილს მიაჩნია, რომ იოველი ძველი აღთქმის სასულიერო დასს განეკუთვნებოდა, რადგან მის წიგნში საკმაოდ ხშირადაა საუბარი მღვდლებზე, მსხვერპლზე. ამის საპირისპიროდ არსებობს ცნობები, რომელთა მიხედვითაც იოელი რუბენის (ერთი ცნობის მიხედვით) ან გადის (მეორეს შესაბამისად) შტოს განეკუთვნებოდა. წიგნის შინაარსის გათვალისწინებით, იოელი სამხრეთ სამეფოს მკვიდრია, რადგან ყველა მისი მიმართვა იუდეის სამეფოს ეხება და სიონის ძეებისკენაა მიმართული.

იოველის მოღვაწეობის დრო

       მეცნიერთა მიერ წინასწარემეტყველის მოღვაწეობის ეპოქის შესახებ განსხვავებული ცნობებია წარმოდგენილი. ნაწილი მას ბაბილონის ტყვეობის პერიოდის მოღვაწედ მიიჩნევს; სხვანი იოველის საქმიანობას 868\838  წლებით ათარიღებენ.

იოელის წიგნის შემადგენლობა

       წიგნი ოთხი თავისგან შედგება. წინასწარმეტყველი ასპარეზზე გამოდის იუდეის სამეფოს თავსდამტყარი უბედურების ჟამს, რაც კალიების შემოსევის სახითაა აღწერილი. იოველი დეტალურად აღწერს ხსენებულ მოვლენას და ყველას სინანულისა და უზენაესისადმი ვედრებისკენ მოუწოდებს, რადგან წინასწარმეტყველი განსაცდელს ცოდვის შედეგად აღიქვამს.
მისი წინასწარმეტყველების მთავარი თემებია:

1. უწყება კალიების შემოსევის შესახებ (კალიების ოთხი სახეობა).
2. წინასწარმეტყველება სულიწმინდის მოვლინების შესახებ.
3. უწყება საყოველთაო სამსჯავროს თაობაზე.

♦ იოველ წინასწარმეტყველი ♦