კიწი გეგეჭკორზე ამბობდნენ ძუკუ ლოლუას საუკეთესო მოწაფეთაგანია, მისი სტილის შემსრულებელი და მომღერალია და თქვენ წარმოიდგინეთ, გარეგნობითაც კი ჰგავსო.

      "ხელოვნებაში მთავარია სიმართლე" - გეტყოდათ, თუ შეეკითხებოდით. ხალხური სიმღერის გარდა, სხვა სანუკვარი საჩუქარი არაფერი უძებნია. ბავშვობიდანვე დაჰყვა სიმღერის ტრფიალი, ჩონგურის საჯაროდ გამოყენება; ჩაჯდება ძუკუს გუნდის შუაგულში და ჩონგურზე ლირიკულ სიმღერებს ამღერებს. თვრამეტი წლის ჭაბუკი ჩონგურის საჯაროდ გამოტანის პიონერია.

      1907-1911 წლებში სამხედრო ბეგარას იხდის, შემდეგ ისევ სოხუმშია, მღერის, ისევ ჩონგურს ჩაჰკირკიტებს, ხალხური ჰანგებია მისი სტიქია.

      მაგრამ დაიწყო პირველი მსოფლიო ომი, გაიწვიეს. ებრძვის გერმანელებს; მეთაურთა რიგებში წამოსწიეს, გულმართლად იბრძოლა ჩაატარა. 1917 წლიდან ბათუმშია, დემობილიზაციაში მოჰყვა, უმალვე გიმნაზიის გუნდი შექმნა. კონცერტები, წარმატება; ხუთი წელიწადი მოღვაწეობა ბათუმში და შემდეგ ქუთაისში წასვლა ძუკუსთან კონცერტებში მონაწილეობის მისაღებად. 1925 წლიდან თბილისში ძუკუს გუნდში მომღერალთა მთავარი ბირთვის ხელმძღვანელია, თან მეაბრეშუმეობის კურსებს ამთავრებს თელავში და მშობლიური ზუგდიდისკენ მიემგზავრება. მუშაობს მთავარ მეაბრეშუმედ. გადადის სოხუმში, საგუნდო სიმღერებსა და ჩონგურს მაინც ესათუთება. გუნდის ხელმძღვანელებს ეხმარება, მათი კონსულტანტია.

      მალე გალი იხმობს. რაიონში შესანიშნავ გუნდს აყალიბებს და 1934 წელს ოლიმპიადაზე იმარჯვებს. თბილისში კონცერტებს მართავს, წარმატება აქვს. მუშაობს დაუღალავად, მრავალგან აარსებს მომღერალთა გუნდებს. მეოთხე და მეხუთე ოლიმპიადებში წარმატებით გამოდის და სოხუმში მოღვაწეობით დიდ სახელს იხვეჭს. სამამულო ომის წლებში ზუგდიდშია, აქ გუნდს ხელმძღვანელობს, ემსახურება დაჭრილ მეომრებს, უმსუბუქებს ომით მიყენებულ ტკივილებს.

      სოხუმის ანსამბლის მხატვრული ხელმძღვანელია. ათი წელიწადი იშრომა, შესანიშნავად მომზადებული ანსამბლი ჩააბარა რაჟდენ გუმბას, თვითონ კი კარგა ხანს გუნდის კონსულტანტად იმუშავა.

      ივანე (კიწი) ბესარიონის ძე გეგეჭკორს, 1946 წლიდან ხელოვნების დამსახურებულ მოღვაწეს, სოხუმელები 1955 და 1961 წლებში მოღვაწეობის 50 და დაბადებიდან 75 წლის იუბილეს უხდიან. უყვართ ბრგე, ჭარმაგი ხელოვანი, თვითმოქმედი კომპოზიტორი, მრავალი საინტერესო სიმღერის ტექსტისა და მუსიკის ავტორი.

"ფონდი ქართული გალობა"